رسم ابتسامة 1
توقف يلهث بعنف فتابعت بتساؤل : انت بتعمل ايه هنا؟
نزع قبعته يجيبها : جاي اصالحك.. بتصل بيكِ مابترديش
سارت ببطئ وهو جوارها
“مش حابة ازعجك”
ألتفت يوقفها.. يمسك بكفها سائلاً : رُبا هو في ايه.. انا زعلتك في حاجة
نظرت لكفه الذي يحيط بيدها فأبتسمت وسحبتها بلطف.. ثم نظرت بعينيه سائلة : ايه رأيك فيا ياعُدي
قطب حاجبيه بدهشة : رأيي فيكِ ازاي يعني
“اقصد شايفني بنت تافهة زي كل البنات ولا شايفني ازاي”
“شايفك قمر”
اجابته ادهشتها فـ هتفت بعدم تصديق : عُدي ماكنتش اعرف انك بتعرف تغازل
رفع انامله يساوي خصلاته بإرتباك : دي چينات عمار.. ماحنا قعدنا تسع شهور مع بعض لوحدنا ف مأثرة عليا شوية
ضحكت بقوة فـ تجمد امام ضحكاتها.. يطالعها ولا يريدها ان تتوقف فألتفتت له سائلة : بتبصلي كدة ليه ؟
“ضحكتك حلوة قوي”
أخفضت عينيها بخجل فتابع : رُبا.. انتِ بتثقي فيا صح؟
أومأت له ف جذب كفيها يحتضنهم بدفئ : انااا.. انا جوايا مشاعر ليكِ… لكن.. انا مش هقدر اصرح بيها دلوقتي.. مش هقدر اقول اي كلمة غير لما اخلص دراستي واكون قادر ان كل كلمة هقولها هتكون رسمي قدام والدك والناس كلها
اتسعت ابتسامتها بسعادة : كل مرة بتبهرني اكتر بشخصيتك يا عُدي
واقتربت تطبع قبله على وجنته هامسة : انا بحبك
ابتسم واحتقن وجهه خجلاً لتضحك بقوة هاتفة : انت بجد مش ممكن
سار وجذبها قائلاً : انا مافطرتش.. تيجي نفطر سوا؟
أومأت له وهي تجاوره.. تحيطه بعينيها. لا تصدق انه يبادلها مشاعرها.. كان بالنسبة لها حلم وآن تحقيقه.
***
دلف غرفة مكتبه ليجده بالداخل فأغلق الباب مسرعاً
“زياد.. انت اتجننت مش تقول انك هنا.. ولا عايزها تشوفك”
كان يقف ملتصقاً بالنافذه.. عينيه لا تبرح مدخل المطعم الذي ستخرج منه بعد قليل ولم يهتم لدهشة رامز
ف زفر الاخر بضيق وجلس على المقعد خلفه حتى انتهى الاخر من مراقبته وألتفت له بجبين متغضن : مين الواد اللي خارج معاها دا
نهض رامز يجاوره بجانب النافذه : دا بكر.. شغال هنا بردو
جز على اسنانه بغضب : وبكر ايه علاقته بمريم يا رامز
“وانا مالي ياعم.. بتزعقلي ليه.. زمايل وبيوصلوا بعض.. وبعدين ماهي عليا معاهم اهي مش لوحدهم”
تهالك الاخر على المقعد ليتابع رامز حديثه : وبعدين انت هتفضل تنطلي هنا كل يوم
رفع زياد نظره له قائلاً : شكلك نسيت اني شريك في المكان
