رسم ابتسامة 1
ابتسمت بحب : مش خايف حد من الجيران يشوفك.. او ماما
“مايهمنيش حد.. انا سيبت الدنيا كلها وجيتلك عشان نبدأها سوا… الساعة كام معاكِ؟”
سألها ف نظرت لهاتفها ثم عادت تجيبه : 12 الا دقيقتين بالظبط
“بعد دقيقتين هتبدأ سنة جديدة واحنا مع بعض… سنة جديدة هحبك فيها اكتر من اللي قبلها.. سنة اتمنى مع نهايتها نكون سوا في بيت واحد”
ادمعت عينيها تأثراً بحديثه : زيااد…
قاطعها هامساً : بحبك يامريم.. بحبك وعمري ماهبطل احبك.. مع كل يوم بيعدي عليا بحبك فيه اكتر من اللي قبله.. كل سنة وانتِ معايا
دقت الثانية عشر لتنطلق الألعاب النارية من حوله ف رفعت عينيها بصدمة تتأملها وهي تشكل اسمها في السماء
عادت تنظر له بعينيها الدامعة : بحبك قوي
“هاااااي.. يابنتي روحتي فين”
كان ذلك صوت علياء الذي اخرجها من شرودها فألتفتت لها بعينين زائغة لتسألها : مالك يامريم ؟
“ولا حاجة” قالتها وهي تخرج من الغرفة متوجهة إلى المرحاض..
***
1 يناير 2020
انطلقت الألعاب النارية من داخل حديقة منزلهم.. بينما اصوات الموسيقى الصاخبة تصدح في الأجواء
تعلقت حلا بعنقه تراقصه بينما تهمس بالقرب منه : Happy New year ياروحي
ابتسم لها بإقتضاب فتابعت بتساؤل : زياد انت بتحبني؟
ابتلع لعابه بإختناق : ليه السؤال دا
رفعت كتفيها بحيرة بينما تهمس بحزن : مش عارفة.. بحسك جد قوي في التعامل معايا.. واللي بيحب حد مابيبقاش بالشكل دا معاه.. انت حتى قليل قوي لما بتخرج معايا وبتضحك ف وشي بالعافية
اخفض عينيه دون إجابتها.. يشعر بالذنب نحوها ما ذنبها هي في صراع قلبه
رفع عينيه ثم ابعد خصلاتها عن وجهها : اكيد بحبك ياحلا انتِ خطيبتي.. بس انتِ عارفة.. دا طبعي مابعرفش اعبر عن اللي جوايا
والكذب كان اقرب له من ان يجرحها بحقيقة ان غيرها تسكن قلبه منذ سنوات ولا يستطيع اخراجها
رفعت اناملها تتحسس وجنته : مش مهم.. المهم انك معايا..
ثم اقتربت تهمس له بدلال : ولما نتجوز هعرف ازاي اخليك تعبر
وعلى جانب اخر كان يقف عمار بجانب احد اصدقاؤه الذي كان يجوب الحديقة الواسعة بعينيه قبل ان يطلق صفيراً معجباً : اوبااا مين الجامدة دي
ألتفت عمار حيث ينظر ليجدها لينا ابنة خالته ف لكزه ناهراً : لم نفسك يابني دي بنت خالتي
“بنت خالتك بالجمدان دا ومخبي”
همس بنبرة لعوب ليهتف به : معاذ وبعدين.. أتلم بقا
