رسم ابتسامة 1
ورحل دون ان يدرك وقع لمسته عليها
هو رجل تفاصيله تربكها.. تغرق بها اكثر
وآه على قلبها الأحمق عندما يبتسم
***
“مريم.. روما… مرمر”
تململت في الفراش بتذمر : عايزة ايه ياعليا سيبيني انام انا بلف من الصبح على شغل وتعبانه
اعتدلت علياء في جلستها هاتفة : قومي بس انا لقيتلك شغل هايل
انتفضت جالسة : بتتكلمي بجد؟
أومأت لها : ايوة والله فاكرة صاحب الكافيه اللي كلمتك عنه الكافيه اللي كنت بشتغل فيه
“اه ماله.. ”
“جه النهاردة الكافيه بالصدفة وشافني قعدنا نتكلم شوية وقالي انه بيفتتح مطعم كبير قوي ومحتاجني معاه ف الشغل كلمته عنك.. وقالي نروح له بكرة الساعة 9”
ابتسمت مريم بسعادة واحتضنتها بقوة : شكراً جداً يا لولو بجد انتِ انقذتيني
ابتعدت تخبرها بإمتنان : انا اللي متشكرة يامريم.. دا كفاية انك مقعداني معاكوا ف البيت
ضربتها في كتفها برفق : بس يابت ماتقوليش كدة انتِ اختي وانا وماما مبسوطين انك معانا
***
وقفت تراقبه من بعيد.. يجلس على المقعد..
يرتدي عويناته الطبية وينظر في تصميم امامه
تنهدت بقوة وتقدمت منه..
وقفت امامه ف لم يشعر بها
“ازيك يا بشمهندس”
رفع عينيه لها مبتسماً : ازيك يا رُبا
“ممكن اقعد معاك ولا هعطلك”
اشار لها نافياً : لا طبعا اتفضلي
جلست امامه سائلة : ليه دايما الاقيك قاعد لوحدك
ألتفت ينظر إلى اصدقاءه ويجيبها : زي مانتِ شايفة..
ابتسمت بهدوء تسأله : مابتحبش تقف مع بنات؟
“مش بالظبط.. انا مابحبش البنات التافهة ودول تافهين”
التمعت عينيها بإعجاب : انت شخصية جميلة ياعُدي
اخفض عينيها هامساً : متشكر
ظلت تتأمله بإبتسامة وعاد هو إلى التصميم امامه يعدل عليه حتى قطعت لينا جلستهم الصامتة
“ازيكوا ياكتاكيت”
رفع عُدى احد حاجبيه ونظر لمن تقابله هامساً : مش هنخلص
ارتفعت ضحكاتها بينما قطبت لينا حاجبيها بتذمر : كدة ياعُدي
قرص وجنتها قائلاً : ماتزعليش ياكتكوتة بهزر
ابعدت يده بحنق : رخم اصلا ، انا غلطانة اني جيت اقعد معاكم بدل مانتوا ساكتين كدة
نهضت رُبا تخبرهم : انا كنت قايمة عندي محاضرة دلوقتي.. يالا باي
تركتهم ليعود عُدي إلى تصاميمه بينما الأخرى مترددة في سؤاله عن توأمه الغائب
“اااا.. عُدي هو… هو عمار فين” سألته بتلعثم ليقطب حاجبيه مستفهماً
“بتسألي ليه؟”
اجابته : ابداً عادي.. اصل النهاردة مالوش اثر خالص وكلمته فونه مقفول
