اعلن 4الاخير
قال رائف:
-جيسى متعلقة بمامتها اوى،زيك ..مش كدة؟
أومأ مراد برأسه قائلا بتقرير:
-ماما وطنط ماجى أمهات تستاهل تتحب.
ابتسم رائف ولم يعلق ..وصلا إلى الحديقة،فجلسا على الأرجوحة..وما ان جلسا حتى اقترب منهما شاب متوسط الطول بشوش الوجه..يستأذن رائف بالرحيل لزيارة والده فأذن له بود..ثم استدار رائف لمراد قائلا:
-شايف الشاب ده يامراد ،شايف أد ايه مؤدب ومحترم،ويبان مبسوط..بس مع الأسف رغم ابتسامته، الحزن باين جوة عنيه؟
أومأ مراد برأسه ليستطرد رائف قائلا:
-عماد ده بالذات بحسه زي ابنى، مش طباخ شغال عندى وبس..حكايته هي اللى قربت بينا وخليتنى أشغله عندى أساسا،كانت والدته الست نجية الله يرحمها شغالة عندنا ..وكانت بتقاسى كتير من جوزها اللى كان بيشغلها ويشرب بفلوسها..كان بيعاملها بقسوة واحد خلاص الشرب ضيع عقله،كنت كتير بلاقيها معيطة وخايفة على إبنها من قسوة جوزها عليه وضربه فيه..مكنش فى ايدى حاجة أعملهالها غير إنى أسجنه بس هي رفضت ،خافت على ابنها من سمعة أبوه اللى ممكن تدمره..حاولت أساعدها على أد ماقدرت،شغلت ابنها معاها عشان يكون جنبها وتحت عنيها..دارت الأيام وماتت ست نجية ،فضلت أساعد عماد وأبعد عنه أذى والده على أد ماقدرت..لغاية ماوالده عمل حادثة واتشل ،ورغم كدة عماد مرضاش يتخلى عن والده.. مكنش قادر على الشغل ورعاية والده فى نفس الوقت إلا إنه حاول بكل جهده..حاولت أساعده ماليا رفض،فدخلت والده مصحة تقدر ترعاه وفهمته ان المصحة بترعى بعض الحالات بدون مقابل كحالات إنسانية يعنى..ومن ساعتها وهو بيزوره يومين فى الأسبوع بيقعد معاه ويراعيه وكأنه كان أب مثالى، مش أب مراعاش ربنا فى عيلته ،بالعكس وراهم ظلم كتير..ده حتى لماسافرت مرضاش عماد يسافر معايا وقعد هنا فى البيت ياخد باله منه عشان خاطر ميبعدش عن والده، كنت بستغرب دايما بِرّة بباباه..رغم كل اللى شافه منه هو ومامته الله يرحمها وفى يوم سألته تعرف رد وقاللى إيه؟
كان مراد يستمع إليه مطرق الرأس فرفع رأسه يطالعه فى تلك اللحظة حين استطرد رائف قائلا:
-قاللى ان ربنا جعل العقوق من الكبائر بعد الشرك بيه..وان الرسول صل الله عليه وسلم قال…
قال مراد:
-عليه الصلاة والسلام
قال رائف بإبتسامة:
– قال ان كل الاعمال يؤجل حسابها فى الآخرة، إلا عقوق الوالدين جزاؤه عند ربنا بيكون فى الدنيا والآخرة..وده أكيد من عِظم الذنب.
