اعلن 4الاخير
ضم حسن ياقته قائلا:
-طول عمرى.
ليجلس أمامهم وهو يستطرد بجدية:
-سيبكم بقى من الهزار وخلينا فى الجد،إزاي هنقدر نثبت براءة حسام وهو فعلا بريئ ولا….
قاطعه مجد قائلا:
-مادام أختك واثقة فى برائته يبقى أكيد بريئ وأنا حاسس بكدة كمان،حسام ممكن يكون ألف حاجة لكن قاتل ،معتقدش،عموما مش هنقدر نعمل أي حاجة قبل ما سماح تزور حسام ونعرف أكتر عن ملابسات اللى حصل وأنا من بكرة هبدأ أعمل تحرياتى عن القتيلة.
قال رائف بجدية:
-وأنا معاك،هساعدك بكل طريقة أقدر عليها.
قال حسن بجدية بدوره:
-كلنا معاك.
لينقل مجد بصره بينهما قبل أن يومئ برأسه بإرتياح.
********************
تطلع إليها حسام فى صدمة قائلا:
-سماح ؟!!!
نظرت إليه سماح قائلة بهدوء:
-إزيك ياحسام،عامل إيه؟
قال حسام وهو يشير إلى جدران الغرفة :
-زي ما انتى شايفة ،مسجون بين أربع حيطان..شفت جوة الزنزانة اللى عمرى ماحلمت أشوفه.
ليبتسم بمرارة مستطردا:
-من يوم ماسيبتينى والدنيا ملخبطة معايا ياسماح.
تجاهلت جملته الأخيرة وهي تقول:
-مجد هيدافع عنك ،هو عند وكيل النيابة دلوقتى بيطلع على المحضر وبإذن الله يلاقى ثغرة تطلعك من القضية دى وتثبت برائتك.
قال فى لهفة:
-يعنى انتى عارفة انى بريئ ؟لسة عندك ثقة فية.
طالعته قائلة بنبرة باردة:
-أكيد مبقاش عندى ثقة فيك ،بس رغم كدة متأكدة انك مش ممكن تقتل.
أطرق رأسه بإحباط ثم رفعها إليها عندما قالت:
-أنا عايزاك تحكيلى كل حاجة عن نور .
قال بحيرة:
-اشمعنى؟!
قالت:
-جايز فى أي تفصيلة تقولها نلاقى حل اللغز ده،من الواضح ان القضية مش وراها سرقة،وده يبان من طريقة قتلها.
مرر حسام يده فى شعره بتوتر قائلا:
-أنا معرفش عنها غير حاجات قليلة وكلها عرفتها بالصدفة.
رمقته بملامح خالية فقال بتوتر:
-ياسماح أنا متجوزتهاش عشان بحبها،أنا…
رفعت يدها تشير إليه بالصمت قائلة:
-مش عايزة أي توضيح فى موضوع جوازك منها لإن الموضوع ده ميخصنيش لو سمحت،أنا اللى يخصنى دلوقت انك تدينى أي معلومة تقدر تفيدنى وتفيد مجد فى القضية،عشان نقدر نثبت برائتك ونخرجك من هنا، سمعتك دلوقتى تهمنى بس عشان خاطر مراد…ابنى وبس .
أطرق برأسه حزنا قائلا:
-وهو عامل إيه دلوقت؟
قالت بمرارة:
-تفتكر هيكون عامل إيه وباباه متهم فى جريمة قتل وجه البوليس خده أدام عنيه؟أكيد متدمر نفسيا.
