اعلن 4الاخير
قالت جيسى بسرعة:
-طيب إسبقونى انتوا وهحصلكم..هكلم بابا فى التليفون هطمنوا علينا وأقولوا ان احنا راجعين خلاص.
أومأ كل منهم برأسه ومشيا سويا بإتجاه رائف وسماح لتنظر بيرى إلى مراد قائلة بتردد:
-مراد هو أنا ممكن أسألك سؤال وتجاوبنى بصراحة؟
اومأ برأسه قائلا:
-طبعا ..إسألى يابيرى.
قالت بتردد:
-هو انت..يعنى وجيسى قريبين من بعض أوى كدة..
رمقها بتساؤل لتقول بإرتباك:
-قصدى يعنى..انى..لاحظت إنها بتمسك إيدك دايما واللى أعرفه عن جيسى إنها مبتمسكش إيد ولد مهما كانوا صحاب..وده معناه انكوا..يعنى…
إبتسم وقد أدرك ماتلمح إليه..فقال:
-أنا وجيسى نبقى إخوات فى الرضاعة يابيرى.
ظهرت السعادة على ملامحها وهي تقول:
-بجد؟؟
اومأ برأسه قائلا:
-آه بجد..وبعدين الحاجة اللى انتى فكرتى ممكن تجمعنى بجيسى أكيد مش هتبقى موجودة بينى وبين أي واحدة عموما.. إحنا لسة صغيرين أوى على اننا نحس بيها ولا إيه؟
كادت أن تومئ بالإيجاب..ولكن قاطعتها جيسى التى وضعت كلتا يدها على كتفيهما قائلة بحماس:
-بتقولوا إيه من غيرى ياأساتذة..فاتنى إيه..يلا..إعترفوا.
لتبتسم بيرى وهي تنظر إلى مراد قائلة:
-مش كتير ..كنت بسأل مراد عن حاجة والحقيقة لقيت إجابته مقنعة جدا..
ثم إنطلقت تجرى بإتجاه والدها الذى إحتضنها وهو يدور بها لتنطلق ضحكاتها بسعادة تطالعهما سماح بحنان بينما عقدت جيسى حاجبيها فى حيرة قائلة:
-سؤال إيه ده؟
لم يجبها مراد وإنما تعلقت عيونه بتلك الفتاة التى تنطلق ضحكاتها..لترتسم على شفتيه إبتسامة تشاركها تلك السعادة البادية على ملامحها.
*******************
نقل مجد بصره بين الحضور قائلا بدهشة:
-كتب كتاب وخطوبة.
أومأ كل من حسن و هادى برأسيهما بينما أطرقت كل من هاجر وسمر برأسيهما فى خجل ..ليبتسم مجد بخبث قائلا:
-عشان كدة قطعتوا شهر العسل بتاعى وخلتونى آجى بأقصى سرعة مش كدة؟
قال حسن بإستنكار:
-قطعنا شهر العسل بتاعك إيه بس ؟انت داخل على شهرين ياأخويا..هو شهر العسل بتاعك ده مبيخلصش.
وكزته هاجر عندما لاحظت خجل زوزا فلاحظ بدوره خجلها وحنق مجد ليقول بسرعة:
-عموما يامجد لو عايز تكمل براحتك يااخويا ..بس خلينا نعمل الحفلة الأول ..عشان خاطرنا.
تعلقت به العيون ليقول بهدوء:
-والله لو الكل موافق ..أنا معنديش مانع..نستنى بس سماح تيجى دلوقتى ونسألها عن رأيها هي كمان ولو موافقة يبقى نتوكل على بركة الله..
