اعلن 1
قالت ماجى فى نفسها
“حياتك كلها غلط ياموحة ..وكلنا شايفين كدة..بس انتى اللى لسة عايشة فى العالم الوردى اللى رسمتيه لنفسك ومش قادرة تشوفى الحقيقة ..الحقيقة اللى أنا وإخواتك وكل اللى يعرفوكى شايفينها..والحقيقة دى إنك تستاهلى فرصة تانية تعيشى فيها لنفسك وبس..تبطلى تسعدى اللى حواليكى وتسعدى نفسك وبس..إنتى تستاهلى تبقى مبسوطة ياسماح”
أفاقت من أفكارها على صوت سماح وهي تقول بقلق:
-حتى مراد ياماجى..النهاردة مش طبيعى خالص،وبيقول كلام غريب.
عقدت ماجى حاجبيها وهي تقول:
-مراد؟قالك إيه مراد؟
أخبرتها سماح بما قاله لها مراد لتتوجس ماجى خيفة..ترى هل أصبح لدى مراد نفس الشك الذى أصبح يراود ماجى بالفترة الأخيرة؟خاصة وقد رأت صور لحسام مع نور على صفحة شركته..ونظرة نور لحسام التى لا تبشر أبدا بالخير،ولا تدرى ماجى كيف لا ترى سماح تلك النظرات وكيف تثق بها وبزوجها تلك الثقة العمياء؟طال صمتها لتفيق على صوت سماح تقول بقلق:
-روحتى فين ياماجى؟
قالت ماجى بإضطراب:
-انا هنا..مروحتش فى حتة..بسمعك ياموحة.
قالت سماح:
-طيب إيه رأيك..أفهم إزاي مراد إن انا مبسوطة بحياتى كدة،وراضية بيها بالشكل ده؟
قالت ماجى بهدوء:
-إزاي هتقنعيه باللى إنتى مش مقتنعة بيه أساسا؟
قالت سماح:
-يا ماجى أنا يمكن كان نفسى أعمل حاجات كتير ويمكن جوازى من حسام منعنى،بس ده مش معناه إنى مش مبسوطة بحياتى كدة،أنا عندى زوج طيب وبيحبنى وإبن ربنا يخليهولى وإخواتى كمان..هطلب إيه أكتر من كدة؟
قالت ماجى بتقرير:
-ناقصك تحققى طموحك وأحلامك اللى هم جزء منك،كمان ناقصك أهم حاجة فى الدنيا..ناقصك تعيشى ياسماح.
تنهدت سماح قائلة:
-ما أنا عايشة أهو.
قالت ماجى بهدوء:
إنتى عارفة كويس إنك مش عايشة وبتحاولى تاخدى منى كلام يأكد أوهام بتحاولى تقنعى بيها نفسك ،وأنا عمرى ما كدبت عليكى ياسماح ومش هبدأ دلوقتى،فكرى كويس فى كلام إبنك وكلامى،وياريت بعد ما تفكرى،تبدأى تشوفى اللى كلنا شايفينه من زمان.
أغمضت سماح عينيها بحزن..تدرك أنها بالفعل تدرك الحقيقة ولكنها تحاول إنكارها..بكل ما أوتيت من قوة.
********************
قالت هاجر بحنق:
-إنت تانى؟
إتسعت إبتسامته الساخرة وهو يقول:
-وإنتى تانى.
رمقته بحنق قائلة:
-طب حاسب من أدامى خلينى أعدى ولا هتفضل واقف فى طريقى كتير؟
