اعلن 1
حاولت هاجر أن تهدئ أنفاسها الغاضبة كي لا تتهور..فأمثال هذا الرجل يحتاج إلى الروية فى التعامل وربما بعض البرود أيضا..لتقول بهدوء:
-من فضلك يامحترم..لو سمحت..خليك فى حالك وملكش دعوة بية،أشيل أكياس بقى أو لأ..أنا حرة..ومش محتاجة مساعدة ولو احتجت أكيد مش هطلبها منك انت..مفهوم..ولا انت من الناس اللى بيحتاجوا أعيدلهم الكلام أكتر من مرة؟
ظهر الغضب على ملامحه وهو يقول بحدة:
-إشمعنى يعنى..مالى؟مش عاجبك ليه ودايما مصدرالى الوش الخشب؟ناقص إيد يعنى ولا ناقص رجل؟
زفرت هاجر بقوة قبل أن تقول بنفاذ صبر:
-مش مفروض إن حضرتك تهمنى أساسا..أو يكون لية أي رأي فيك،وياتسيبنى فى حالى.. يابجد هتضطرنى أشتكيك.
عقد مرتضى حاجبيه بشدة وانتفخت أوداجه وهو يتقدم منها خطوة لتتراجع رغما عنها وقد شعرت بالرهبة..وهو يقول بغضب:
-الظاهر إنك مبتجيش بالذوق ولازم تيجى بال….
قاطعه صوت غاضب النبرات تعرفه هاجر جيدا جاء من خلفها وهو يقول بحدة:
-فيه حاجة يامرتضى؟
رمق مرتضى محدثه بحنق ثم قال بحدة:
-مفيش ..الحق علية ..حبيت أعمل بأصلى زي أي ابن بلد ميهونش عليه بنت شارعه تشيل تقيل وهو واقف…..
قاطعته هاجر قائلة بحدة:
-وأنا قلتلك خليك فى حالك..وملكش دعوة بية.
قال مرتضى بغضب:
-شايف ردها وأسلوبها معايا؟
قالت هاجر بغضب:
-وإنت مين انت….
قاطعها حسن وهو يتقدم أمامها مواجها مرتضى قائلا بصرامة:
-عرضت خدماتك عليها ورفضت..وقالتلك إنها فى غنى عنها،يبقى تخليك فى حالك زي ما قالتلك ومتحاولش تقربلها تانى..مفهوم يامرتضى؟
نظرت هاجر إلى ظهر حسن فى حيرة من موقفه.. وإتخاذه صفها بعد أن توقعت العكس تماما،ظنا منها أنه لخلافه معها سيؤازر هذا المرتضى..لتنفض حيرتها عندما قال مرتضى بعيون تطاير منها شرارة الغضب:
-والباشا آخد الموضوع على أعصابه كدة ليه..السنيورة دى تخصك فى حاجة؟
إقترب حسن منه بعيون ظهرت فيهم صرامة بالغة وهو يقول ببرود كالجليد:
-كلمة زيادة وقسما بالله ماهبقى على جيرة ولا عشرة..والبادى أظلم يامرتضى.
نظر إليه مرتضى للحظات بتحدى..قبل أن تظهر إبتسامة ساخرة على وجهه وهو يتنحى جانبا بصمت..بينما إسترخت ملامح حسن وهو ينظر إلى هاجر بعيون باردة قائلا:
-إتفضلى أدامى.
رغم نبراته المتسلطة..وحدة نظراته ،وحنقها منه إلا أنها أطاعته على الفور ترغب بالهرب من هذا المرتضى ودقات قلبها التى تسارعت خوفا لأول مرة فى حياتها من نظرات رجل وقح مثله..بينما تبعها حسن بهدوء وما أن ابتعدا قليلا حتى تحولت نظرات مرتضى الساخرة إلى نظرات حاقدة..وهو يقول بغل:
-بقى كدة ياحسن ،مبقاش مرتضى إبن الشيخ سالم،إن ما جبت عاليها واطيها ..والبادى حقيقى أظلم ياإبن الصعيدى.
