اعلن 2
قالت هاجر :
-مكنش ينفع يقول غير كدة..الناس جت ومجد معانا فى الشقة فى وقت متأخر..تفتكرى هنبررلهم وجوده بإيه ،وتفتكرى لو كنا قلنا الحقيقة كانوا هيصدقوا؟معتقدش..أعتقد ان ده كان الحل الوحيد قصادهم.
أومأت سمر برأسها موافقة..ثم نظرت إلى هاجر قائلة بإرتباك:
-إنتى قلتيلى ياهاجر إن مراته..يعنى ماتت..صح؟
أومأت هاجر برأسها موافقة لتستطرد سمر قائلة :
-تعرفى عنها إيه؟قصدى يعنى هادى قالك عنها إيه؟
لمعت عيون هاجر وهي تقول بإبتسامة:
-وإنتى عايزة تعرفى ليه؟
قالت سمر بإضطراب :
-أبدا يعنى..أصل ..إنتى مش جايلك نوم..وأنا كمان فقلت ندردش شوية.
نهضت هاجر تقول بنشاط:
-لأ..مادام فيها دردشة..يبقى نعمل كوبايتين كابتشينو..عشان السهرة هتحلو.
ثم توجهت إلى المطبخ تتابعها سمر بعينيها ..تدرك فى أعماقها أن رغبتها فى معرفة المزيد عن زوجة مجد ليس فضولا عاديا منها وإنما رغبة فى معرفة المزيد عن هذا الرجل الذى تزداد إعجابا به..يوما بعد يوم.
********************
قال حسام بصوت متهدج من البكاء:
-مكنتش عايز أعمل كدة..صدقينى هي اللى إستفزتنى بكلامها..مش عاجباها حياتنا..كان ناقص تقوللى طلقنى،لأ،دى قالتها فعلا.
ربتت نور عى رأسه الرابض على حجرها وعيونها تلتمع من السعادة ولكنها قالت بحزن مفتعل:
-معلش ياحبيبى متزعلش نفسك..إيه يعنى غلطت فى حقك وضربتها قلم؟ما إنت واجبك تربيها..هي فاكرة نفسها إيه يعنى ؟ملكة بريطانيا.
رفع وجهه على الفور إليها وهو يقول:
-لأ متظلمهاش..سماح متربية فعلا وعمرها ما غلطت فية..بالعكس طول حياتنا مع بعض وهي شايلانى فوق راسها،مستحملانى ومستحملة ظروفى..وعصبيتى..وقفت ورايا لغاية ما فتحت شركتى وبقالى إسم فى السوق،باعت دهبها واديتنى فلوسها اللى فى البنك..ومبخلتش علية بحاجة،سماح بجد الزوجة اللى أي حد بيتمناها ..وأنا عاذرها فى اللى قالته النهاردة..أنا فعلا قصرت معاها أوى لكن خوفى من إنها تسيبنى هو اللى خرجنى عن شعورى.
كانت نور تستمع إليه بحنق..وهو يمجد فى زوجته ويعدد مميزاتها،ولكن حنقها وصل للنهاية وتحول إلى غل من كلماته التى تخبرها بأنه يتمسك بها بقوة وأنه من المحال أن يتخلى عنها..لتنوى أن تفعل شيئا بخصوص ذلك..نفضت أفكارها مؤقتا..وهي تقول برقة:
-خلاص ياحسام إنسى..وهي كمان هتنسى والأمور هترجع طبيعى من تانى.
