اعلن 2
قال هادى بحنان:
-طيب أسيبك دلوقتى تنامى..وخلى بالك من نفسك ياحبيبتى.
قالت بسرعة:
-إستنى بس..قوللى ..أخبارك إيه مع سمر؟
أطلت سمر أمامه بصورتها البهية على الفور حين ذكرتها أخته..ليتنهد بشوق قائلا:
-مش عارف يا هاجر..فى لحظة بحس إن ممكن يكون فيه أمل لعلاقتنا.. أمل بسيط تحس بية ،لكن فى اللحظة اللى بعدها بكون شبه متأكد من إنى كنت عايش وهم ،وإنها عمرها ما هتبقى لية.
قال هاجر فى شفقة:
-معلش ياهادى..أصبر عليها،إنت عارف اللى حصل زمان من باباها واللى أثر عليها هي بالذات زي ما مجد حكالك..بتهيألى الفرصة اللى ربنا إدهالك هتقربها منك وهتخليها تتأكد إنك بتحبها وإنك مبتتمناش فى الدنيا دى كلها غيرها ..وإنك لوحدك اللى هتقدر تسعدها.
تنهد هادى قائلا:
-ياريت ياهاجر ..ياريت.
إبتسمت هاجر بحنان وهي تقول:
-تصدق..وحشتنى ياهادى ووحشنى الكلام معاك.
إبتسم هادى قائلا:
-إنتى كمان وحشتينى ياهاجر..هانت ياحبيبتى ..كلها شهرين والترم يخلص وتيجى تقضى معايا الأجازة بس أكيد هجيلك إسكندرية قبلها..
إبتسمت وهي تشير إليه بسبابتها قائلة بمرح:
-أكيد.
إبتسم بدوره قائلا:
-تصبحى على خير.
قالت بحنان :
-تلاقى الخير.
ثم أغلقت محادثة الفيديو يتبعها جهاز اللاب توب الخاص بها..لتنتفض على صوت سمر التى قالت :
-قلقانة زيي..مش كدة؟
إلتفتت إليها هاجر تقول:
-خضتينى ياسمسمة..إنتى هنا من إمتى؟
إبتسمت سمر قائلة:
-لسة جاية حالا.
قالت هاجر بصوت شابه بعض الإرتياح :
-كويس.. قصدى يعنى أيوة قلقانة..بس الكلام مع هادى ريحنى شوية.
جلست سمر بجوارها قائلة :
-أنا كمان كلمته من شوية..وحكيتله على آخر التطورات فى حالتى والكلام معاه فعلا ريحنى..بس محكيتلوش عن اللى حصل النهاردة..سيبتك انتى تقوليله.
أومأت هاجر برأسها ..لتقول سمر بحيرة:
-تفتكرى مجد عمل إيه مع الشيخ سالم وإيه الدليل اللى وراهوله وخلاه يقتنع بكلامه؟
هزت هاجر كتفيها قائلة بصوت شابه بعض الإضطراب:
-مش عارفة ..عموما مجد ذكى وأكيد إتصرف..هادى قاللى كدة.
أومأت سمر برأسها تقر فعلا بذكائه..لتنظر إلى هاجر قائلة:
-بس تفتكرى صدقوا إنى يعنى.. ممكن أكون مرات مجد..وانتى خطيبة حسن.
مطت هاجر شفتيها قائلة:
-بتهيألى آه،وإلا مكانوش سابونا ومشيوا.
قالت سمر بإرتباك:
-يعنى ملقاش غير الكدبة دى يقولها.
