اعلن 2
أخذت الهاتف من يد مراد ووضعته على أذنها..تجلى صوتها الذى تحشرج بداخلها يأبى الخروج وهي تقول:
-ألوو.
قال مجد على الفور:
-مالك ياسماح..فيكى إيه؟طمنينى عليكى.
قالت بإضطراب:
-أنا..كويسة..مفيش فية حاجة يامجد..شوية برد بس ..هاخد العلاج وشوية لمون وهبقى زي الفل.
قال مجد:
-الكلام ده تقوليه لحد تانى..أنا أخوكى ،أخوكى اللى حافظك وعارفك وأقدر أسمع مرارة صوتك وأعرف إن الموضوع أكبر من شوية برد ياسماح..متخبيش علية وقوليلى مالك ياإما هتلاقينى عندك وهعرف بطريقتى.
قالت بسرعة:
-لأ متجيش.
عقد مجد حاجبيه لتغمض عينيها وهي تحاول ان تجد ثباتها لتقنعه بكلماتها وهي تفتح عينيها قائلة:
-قصدى يعنى مينفعش تيجى، وانت عارف ليه؟
ليقول مجد :
-هتصرف ،ملكيش دعوة.
قالت سماح :
-خلاص خلاص هقولك..إتخانقت ياسيدى مع حسام..كان واعدنى بإنه يتفرغ لينا شوية ويخرجنا،وانت عارف شغله بقى واخد كل وقته وللأسف موفاش بوعده..
قال مجد دون إقتناع:
-عايزة تفهمينى إنك قافلة على نفسك الباب يومين لا أكل ولا شرب..بسبب خناقة مع حسام..ما ياما إتخانقتوا وعلى حاجات أصغر من كدة كمان،إيه الجديد ؟
قالت سماح وهي تشرد فى ما حدث من حسام تلك المرة الأخيرة ،رافعة يدها تتحسس وجنتها التى ماعادت تؤلمها جسديا ولكن ألمها النفسى مازال حيا:
-عندك حق،مفيش جديد..بس يمكن مليت شوية.
قال مجد:
-وذنب مراد إيه يا سماح؟الولد متأثر عشانك جدا..
نظرت سماح إلى مراد الواقف على مقربة منها يطرق رأسه بحزن..لتسمع مجد مستطردا:
-وبعدين حسام مسافر فين؟
قالت سماح بدهشة:
-مسافر؟!
رفع مراد عيونه إليها يومئ برأسه بقوة..لتدرك أنه أخبر خاله بتلك الكذبة ليبرر غياب حسام..ليقول مجد:
-هو مش مسافر ولا إيه؟
قالت بسرعة:
-لأ..مسافر طبعا المنصورة فى شغل..بس إستغربت إنت عرفت منين.
قال مجد:
-من مراد..الولد ده حساس أوى،وانتى بعيدة عنه وغرقانة فى حزنك..وهو تعبان علشانك..متخليش غلطاتنا تأثر على أكتر ناس بنحبهم،متعمليش زيي ياسماح ..فياتخرجى من اللى انتى فيه وتاخدى بالك من إبنك ،ياهجيلك من إسكندرية وأخدك معايا .. وأجبرك إذا لزم الأمر.
إبتسمت قائلة:
-مجنون وتعملها.
قال مجد:
-انا عشانك مستعد أعمل أي حاجة ياسماح.
غشيت عيونها الدموع وهي تقول بحنان:
-ربنا يخليك لية يامجد..وما يحرمنيش منك.
