اعلن 2
ضمه حسن قائلا بحنان:
-بكرة ترتاح ياأخويا..أصبر بس وصدقنى مع الأيام هترتاح.
أغمض مجد عينيه يرغب براحة يدرك أنه لن ينالها إلا إذا كفر عن ذنوبه…. جميعا.
********************
نفضت سماح يدها من يده قائلة بعصبية:
-سيب إيدى ياحسام..وجعتنى.
نظر إليها قائلا بحدة:
-وانتى موجعتنيش بكلامك برة ده..يعنى ايه حياتنا بقت مملة؟ويعنى إيه مبقتيش قادرة تتحملى..قصدك إيه؟ها؟اوعى تكونى بتفكرى تنفصلى عنى..اوعى تكونى عايزة تسيبينى؟عشان ده مش ممكن يحصل أبدا.
إتسعت عيناها بصدمة قائلة :
-أنفصل إيه..وأسيبك ليه..إيه الكلام الغريب اللى انت بتقوله ده؟أنا بس مخنوقة وقلت أفضفض معاك يمكن أرتاح.
رمقها حسام بحدة قائلا:
-مخنوقة من إيه بس ياسماح؟إنتى عايشة حياة الكل بيحسدك عليها..عايزة إيه تانى؟
قالت سماح بمرارة:
-عايزة أحس إنى عايشة..آه صحيح عايشة عيشة الكل بيحسدنى عليها،عشان شايفينها من برة،معاشوش اللى انا عايشاه..معايا زوج بيحبنى آه،بس غيرته بتخنقنى..حابسنى جوة البيت..زي الراجل اللى حبس عصفورته فى قفص من دهب لغاية ما إتخنقت وماتت..مانعنى أعرف صاحباتى أو حتى جيرانى،حتى إنى أمارس هواياتى اللى بحبها ده شئ مرفوض..لو شفتنى خارجة أشم نفسى فى البلكونة شوية بتعكنن علية،ولو سمعتنى بغنى أو فرحانة من غيرك بتضايق وكأن مشاركتك لأي حاجة بعملها هي الحاجة الوحيدة اللى ممكن تسمحلى بيها ..قلت مش مشكلة أشاركك معايا مشاعرى واهتماماتى..لقيتك رافض تشاركنى غير مشاعرك واهتماماتك إنت،فضلت أتنازل وأتنازل لحد ما بقى محور حياتى انت وبس..انت وكل حاجة تخصك..إتعودت ومبقتش تفرق معايا..كل شوية أقول لنفسى إصبرى معلش،بيحبك وبيغير عليكى..رغم إحساسى بإنك بتبعد عنى حبة بحبة..وانى بالنسبة لك بقيت شئ مسلم بيه،حاجة ملكك وبس..بقيت بتسرح وأنا جنبك،ومبقتش تهتم بية زي الأول وأنا أقول معلش شغله الجديد آخده.. بكرة يستقر ويرجع حسام اللى حبتيه..بس لا انت بتستقر ولا بترجع.
قال حسام بعصبية:
-ايه ده كله ؟ده انتى شايلة فى قلبك بقالك كتير بقى..بس اشمعنى جاية النهاردة تقولى الكلام ده..ايه اللى فجر الثورة دى..شفتى ماجى النهاردة ولا كلمتيها؟
قالت سماح بحنق:
-مش عشان قلت كلمتين فى قلبى يبقى لازم حد يكون السبب..وماجى اللى انت حاططها فى دماغك دى ومانعنى عنها إنسانة محترمة جدا على فكرة..أنا مش عارفة ليه بتكرهها بالشكل ده؟
