اعلن 2
********************
قال رائف بسخرية:
-كان لازم لما عرضت الجواز على ماجى تقولها إنها مش هتتجوزك لوحدك..لأ هتتجوز معاك طنط سمية كمان.
قال يوسف بحنق:
-ما تلم لسانك يارائف..وبعدين إنت عايزنى بس أعمل إيه؟أبقى عاق وأزعل أمى عشان أرضى مراتى وأكون زوج كويس؟
نهض رائف من مقعده خلف مكتبه وإتجه إلى هذا المقعد المواجه لمقعد يوسف قائلا بهدوء:
-أنا مقلتش كدة بس كمان اللى بيحصل ده ميرضيش ربنا..انت كدة بتظلم طرف لحساب الطرف التانى.. كدة مش هينفع يايوسف،بيتك وسعادتك وحياتك كلها على المحك..مش معنى إن ماجى ساكتة وصابرة على اللى بيحصل يبقى إنت كمان تسكت وتسيب والدتك تتحكم فى حياتك بالشكل ده،لمجرد إنك خايف من غضبها عليك..حاول تفهمها إن اللى بتعمله ده بيضر حياتك،وإنها باللى بتعمله بتتعسك..حاول تعرفها إن لو لفت الدنيا دى كلها مش هتلاقى مرات إبن زي ماجى،خليها تراعى مشاعرها شوية وتتقبلها..ياسيدى مش علشان خاطرك على الأقل،عشان خاطر ياسمين..الحفيدة اللى مفيش أجمل ولا أرق منها.
نظر يوسف إلى رائف قائلا بمرارة:
-تفتكر محاولتش..صدقنى حاولت كتير،بس مفيش فايدة ..ماما أنا عارفها كويس ..مش هتهدى أو ترتاح غير لما أطلق ماجى وأتجوز علا،وده من رابع المستحيلات.
رمقه رائف قائلا:
-يبقى الموضوع كدة لازم له حل سريع والحل ده فى إيدينا يايوسف.
عقد يوسف حاجبيه قائلا:
-حل إيه ده؟
قال رائف وهو يستند إلى ظهر مقعده:
-ندور لعلا على عريس مناسب..وبكدة مامتك هتفقد الامل فى جوازك منها..وتبدأ تتقبل الأمر الواقع،وتتقبل ماجى..أو تديها فرصة.
لمعت عيون يوسف وهو يقول:
-والله فكرة حلوة..بس ندور ليه ما العريس موجود.
لم تعجب رائف نبرات يوسف وأدرك أن القادم لن يعجبه ليثق فى حدسه ويوسف يستطرد :
-إنت هتكون العريس ده يارائف.
نظر رائف إليه بإستنكار وهو ينهض قائلا:
-أنا..أنا إيه بس؟شكرا،أنا حرمت..كفاية أوى جوازتى الأولانية من واحدة بتشبه بنت خالتك بالظبط وكأنهم توأم..ولولا الموت أخدها ورحمنى كنت أنا بنفسى اللى قتلتها.
قهقه يوسف ضاحكا وهو يقول:
-الله يرحمها ..فعلا كانت شبه علا..ما علينا،يعنى مش هتخدمنى الخدمة دى يارائف؟
عاد رائف إلى مقعده خلف مكتبه وهو يقول:
-لأ..خلينى بعيد عن الموضوع ده ودور على حد تانى أنا إكتفيت والحمد لله..مبقتش أفكر فى الجواز ده نهائى،وكفاية علية شغلى و بيرى.
