ابراهيم 3

مصطفى همس ليها و قال:-
محدش واقف غيرنا يا روحي فهي قصدها عليكي و عشان خاطري مشي الدنيا عشان أمي وراها مصيبة و عاوز اعرفها

ميرفت بصت لمصطفى بقرف و قالت:-
عنيا ليك انت وأمك بس مترجعوش تزعلوا في الآخر و تقولوا ميرفت وحشة

ميرفت دخلت المطبخ و أخدت طبق بلاستك كبير و حطت حلة على النار مليانه ماية عشان تغلي و قالت:-
جاية تتآمر عليا في بيتي أما سلختك زي الأرنب مبقاش أنا دولت و أهو اوريكي شوية من اللي كنت بتعمليهم في دلال و أكفر الذنوب اللي جاية تبلينا بيها

أم إبراهيم كانت قاعدة و فاردة رجليها و مغمضة عنيها و كل اللي شاغل بالها بنتها سها اللي هتقعد في السجن لوحدها النهاردة..

…….

سهي كانت شكل ما هي و لكن قررت أنها متخلهومش يشمتوا فيها صحيح هي زعلانه على شعرها و لكن مش هتخليهم يشمتوا فيها و يفرحوا بكسرتها ، استغربت من تأخر أمها بره و قامت اتعدلت و كانت هتروح للعسكري اللي واقف على الزنزانة و لكن ملحقتش لقته داخل و في ايده كيس فيه أكل

نده عليها و قال :-
تعالي خدي الأكل دا أمك و اخوكي سابوهم ليكي قبل ما يمشوا

عقدت سها جبنها و قالت:-
يمشوا ؟! يمشوا يروحوا فين

العسكري ابتسم و قال:-
الست الوالدة أخدت افراج و اخوكي كان بالصدفة جاي يديكم الأكل دا فاخدها و مشي و سابلك الأكل بالهنا و الشفتشي

حطلها الأكل جنبها و سابها تستوعب الصدمة براحتها لحد ما وقفت مره واحده و قالت:-
خرجت و سابتني اعفن في السجن لوحدي ؟! لا لا يعني كلهم بره و كل واحد عايش حياته و دلال فاقت و بقت تمام و هتعيش حياتها و أنا اللي هعفن في الحبس لوحدي ؟!
لا مش هيحصل لنعيش عيشه فل يا نموت إحنا الكل لازم أشوف طريقة أخلص بيها من دلال و البسها ليهم عشان يشرفوا في التخشيبه مهو مش أنا لوحدي اللي هتسجن

المساجين شموا ريحه الأكل اتجمعوا ناحية سها اللي استوعبت إنهم بيجوا ناحيتها فبصت ليهم لقت نظرهم على شنطه الأكل
اخدتها و مسكت فيها جامد و قالت:-
محدش هيمد ايده عليها دي حاجتي و اكلي أنا و محدش هيدوقه

– لا وإنت الصراحه ليكي كلمه أوي بصي يا حبيبتي هو إحنا كدا كدا هناخد الأكل فـ هتجبيه بالذوق و بما يرضي الله و لا ناخد منك بالذوق برضوا و بما يرضي الله

سها بصت ليهم بغضب و قالت:-
هي سايبة ولا اية بقولكم اية أنا جعانه و هموت وأكل من الكفته اللي رحيتها طالعة دي فـ أنا من الآخر كدا مش هدي حد حاجة و هاكل الكفته