ابراهيم 3
أم إسماعيل ضربت على صدرها بحركه شعبية و قالت:-
اخص عليك يا أم إبراهيم أنا اتشفي فيكي ؟ دا إنت صاحبتي الروح بالروح أنا أعمل معاكي كدا ؟!
– و كانت فين الصحوبيه دي وأنا مرمية في السجن ؟! مفكرتيش تيجي تزوريني مره ليه ؟! و لا هي صحوبيه بالاسم بس ؟ قعدت مصطبه و خلاص ، ولا خوفتي ليلطوكي في الموضوع ؟!
أم إسماعيل بقت تحاول تبرر لنفسها و قالت:-
والله العظيم أبدا يا حبيبتي ، إنت عارفه إنك حبيبتي و يهمني مصلحتك ، أنا والله كنت جايلك و حضرت الزيارة فعلاً و لبست و كنت خارجه لكن مرات إسماعيل ابني جالها الطلق فجأة و بدل ما اجيلك جرينا بيها على المستشفي و أهي لسه مرميه هناك اهي هي و بنتها
أم إبراهيم بعدت عن الباب و دخلت و هي بتقول:-
ادخلي يمكن اطلع منك بحل للمصيبة اللي أنا فيها دي
أم إسماعيل دخلت وراها و قالت :-
مصيبة اية كفالله الشر ، قوليلي يا حبيبتي و فضفضي سرك في بير و أكيد هنلاقي حل جبار لكل مشاكلك
أم إبراهيم قعدت و أم إسماعيل قعدت قصادها و أم إبراهيم بدأت تعمل قهوه على السبرتاية و هي يتقول:-
طبعاً إنت عارفه إن سها بنتي في الحبس دلوقتي عشان حاولت تقتل دلال
هزت أم إسماعيل رأسها بايجاب و قالت:-
دا مفيش حد في الشارع لا دا الحارة كلها ميعرفش كملي يا غالية
عاوزة طريقه نطلعها بيها من القضية دي زي الشعره من العجينه ، و عشان تكوني عارفه هي اعترفت إنها اللي عملت كدا و اخواتها كمان اعترفوا
و دلال طالبه الطلاق من إبراهيم يعني بايعة الليلة كدا كدا و مش باقية على حد
– معلش سؤال بس قبل ما نفكر هو إنت خرجتي إزاي دي القضية كانت لبساكي لبساكي يا أم إبراهيم
أم إبراهيم أخدت نفس و قالت:-
أنا زهقت من السؤال دا ، عموما الزفته دلال اتنازلت عن المحضر و خرجت لكن سها لسه جوه و بتتعامل اسوء معاملة
– اسوء معاملة إزاي و جوزها ليه نفوز و ناس يخلوها تخرج في ثواني
أم إبراهيم بصت لأم إسماعيل من تحت لتحت و هي بتصب القهوة و بتقول:-
لا ما جوزها طلقها بعد ما حاولت تقتل دلال ، و الحق بتقال بنتي اللي غلطانه في الموضوع دا
أم إسماعيل هزت رأسها بايجاب و قالت:-
خلينا في المهم يا حبيبتي إنت قولتلي إنها طالبه الطلاق من إبراهيم
هزت أم إبراهيم رأسها بايجاب و قالت:-
دا اللي عرفته من إبراهيم النهاردة
