ابراهيم 3
– ترجعلي ؟!
طب يا ريت وأنا كنت خدتها و خدت عيالي و سبت ليكم البلد باللي فيها و سبت ليكم امكم تخدموها
– يعني إنت يا إبراهيم هتقدر تسامح نفسك لو أمك حصلها حاجة ؟!
اخد نفسي و خرجه على مراحل و قال:-
ابراهيم بيفكر فعلياً في الانتحار عارفينه عشان ترتاحوا كلكم
لف ظهره و كان هيمشي و يسيبهم لكن لقي حسين بيشده من دراعه و بيقول:-
خد هنا إنت رايح فين ؟! لو إنت معملتش اللي قولنا عليه إحنا هنعمله و هتجيب دلال تحت رجل أمك حتي لو اطرينا توسخ سمعتها لكن أمك تفضل عايشة
إبراهيم تف على أخواته و قال:-
أنا هعمل كدا بس مش عشانكم ولا عشان تهديدكم الخايب دا
أمك اللي جوه دي بتمثل وأنا اكتر واحد عارفها زي ما عارفكم بالظبط
أنا هعمل كدا عشان اريح دلال من شركم و شر امكم اللي إنتوا شربتوا منها كتير مهو الزرع زي الزريعه
وأنا كنت اكتر واحد شارب منها و من أختك لكني فوقت لنفسي بس للأسف فوقت متاخر أوي
ابراهيم لف وشه و سابهم و مشي و مصطفى بص لحسين و قال:-
أمك بتمثل ؟! و خلتنا نعمل كدا مع أخوك ؟!
حسين أخد نفس و خرجه بعصبيه و قال:-
حتي لو مكانتش بتمثل كان لازم دا يحصل عشان الكل يرتاح
أختك تخرج و أمك تنبط و تقعد و إحنا نرتاح من الدوشة و الشغلانه بنت ***** دي
مصطفى ضحك بسخرية و قال:-
ولا عمرنا هنرناح طلما اختك سها وأمك أم إبراهيم
حسين بص على أمه من ورا الازاز و ركز في حركتها و عض على شفايفه بغيظ و قال:-
بتمثل عشان نمشي اللي في دماغها و أنا زي الطور شربتها ماشي يما هاتي اخرك
والله كانت حلال فيكي الحبسه مش عارفه دلال خرجت من الحبس ليه
…….
أم إبراهيم كانت قاعدة جوه الاوضة و حاطه على وجهها جهاز تنفس صناعي لكنه مش شغال
كانت بتدعي إن ولادها يتأثروا باللي حصل و يضغطوا على ابراهيم عشان يخرج سها من الحبس
افتكر كلام أم إسماعيل اللي قالته ليها لما جت ليها البيت :-
فلاش باك
أم إبراهيم كانت قاعدة و مش مبطله عياط و ندب فإم إسماعيل قالت ليها :-
خلوا أخواته يضغطوا عليه ، إبراهيم لوحده اللي يقدر يطلع سها من الحبس ، هو اللي عارف مفاتيح دلال و هيعرف يأثر عليها كويس
أم إبراهيم بصت ليها بتركيز و قالت:-
تفتكري ؟! و تفتكري يقتنع و يعمل اللي هقوله عليه و يخرج أخته ؟!
أم إسماعيل بصت ليها و قالت بخبث:-
و لو مقتنعش يبقي ، اقنعي ولادك التانين و هما هياثروا عليه ، لازم عيالك يحسوا إنهم هيخسروكوا لو معلوش كدا
مثلي إنك تعبانه مش قادرة و هتموتي بس اختاري الوقت المناسب عشان ميتاكدوش إنك بتمثيلي عليهم فهمتيني يا حبيبتي ؟!
