رسم ابتسامة 2
“لا.. انا هفضل هنا مع يوسف.. روح انت عشان ماتتأخرش”
انتقلت نظراته بينهم ثم ابتسم بتوتر : طيب انا هعدي الأول ع الدكتورة.. اطمن عليكِ وبعدها همشي
أومأت له ف طبع قبلة طويلة فوق جبينها وعاد للطبيبه التي رمقته بدهشة : خير يا زياد؟
“يوسف مختار”
قطبت حاجبيها سائلة : ماله يوسف؟
اجابها بتوتر وقلق : يعني علاقته بأروى و..
قاطعته متمتمة : لأ ماتقلقش خالص.. يوسف عاقل جداً ومثقف.. مافيش منه خطر على أروى.. هو عشان لامبالي شوية وواخد الدنيا ببساطة الناس بتقول عليه مجنون
“انا فاهم دا.. انا قصدي مش هيكون في أي خطر على حالتها”
“بالعكس.. أروى محتاجة حد زي يوسف في حياتها.. بيأثر عليها بالإيجاب انا لاحظت دا من وقت ماشوفتهم بيقعدوا كتير مع بعض.. ومابيبطلوش كلام.. وكمان يوسف مش مدمن مخدرات.. يوسف هنا بيتعالج من ادمان المهدئات والمنوم.. ماتخافش”
أومأ لها ثم استأذنها ليرحل لكنه لا يستطيع منع نفسه من القلق على شقيقته.
***
وقف يتابعها وهي تدور بين الموائد
منذ عادت تتعامل معه برسمية لا يطيقها..
والأخرى ترمقه بنظرات تحذيرية كلما اقترب من صديقتها
رآها تدلف للداخل ف تبعها يوقفها : عليا ممكن نتكلم
“لأ” قالتها بثبات وواصلت طريقها ليجذبها لداخل مكتبه ثم اغلق الباب واسندها عليه فتابعت : مستر رامز.. كدة عيب
جز على اسنانه بقوة : مافيش زفت مستر .. انا رامز بس ولازم تسمعيني
ابعدت عينيها عنه فتابع : عليا.. انا بحبك والله العظيم وكل الكلام اللي قولته كان حقيقي مش تمثيل.. اه مانكرش اني قربت منك عشان اعرف اخبار مريم.. لكن حبيتك بحنيتك وجدعنتك.. شقاوتك وطيبتك.. شوفت علياء الحقيقية وحبيتها
“مستر رامز انت اهبل”
“إيه!!!”
“لامؤاخذة.. اقصد حضرتك اهبل.. انت فاكرني هصدقك”
زفر بيأس هامساً : طب اعمل ايه عشان تصدقيني
“ابعد عن طريقي.. انا هنا جرسونه بخدم ع الناس وبنزل اكل ومشاريب وانت باشا صاحب المكان.. مُدرك الفرق بينا يا مستر رامز.. ياريت تتعامل معايا ع الاساس دا.. عن اذنك”
***
حالتها تزداد سوء.. الغثيان يتكرر والطعام لا يثبت في معدتها.. اصبحت تختفي في غرفتها حتى لا تلاحظ والدتها شئ لكن إلى متى!!
وصلت لمنزل خالتها ستخبر عُدي ولا تعرف لما.. لكنها لابد ان تجد حل في اسرع وقت
وجدت خالتها تجلس في بهو المنزل وحيدة..
تنظر في الفراغ بشرود..
منذ ما حدث وهي قليل ما تتحدث واغلب الاوقات تجلس وحيدة
