رسم ابتسامة 2
“ازيك ياخالتو.. ألف سلامة عليكِ”
بادلتها الأبتسامة : الله يسلمك يالينا.. عاملين ايه مبسوطين؟
“الحمدلله ياماما.. ماتقلقيش”
“إلهام كانت بتعمل ايه عندكم.. قالتلي ان لينا وحشتها وراحت تشوفها بس حسيت انها مخبية حاجة”
تبادلا النظرات قبل ان يجيبها بأسف : لينا أجهضت..
ساد الصمت للحظات قطعته هي بحزن : معلش ياحبايبي ربنا يعوضكم ان شاء الله.
ودعتهم بعدها بإبتسامة واغلقت الهاتف بينما ظلا هما جالسان في صمت اطبق عليهما..
هو يرمق الفراغ بنظرة خاوية وهي تتابعه
رفعت اناملها تربت على كتفه في دعم
“هتبقى كويسة”
زفر بقوة متمتماً : يارب.. يارب تبقى كويسة بجد
نهضت تخبره : يالا قوم بقا غير هدومك وتعالى ناكل سوا انا عاملة الأكل النهاردة
جفف عينيه من اثر الدموع ثم رفعها نحوها بدهشة : انتِ يا لينا !!!
“أيوة انا.. في ايه مالك؟”
ابتسم بخفة سائلاً : انتِ بتعرفي تطبخي اصلا؟
“يعني مش قوي بس قولت اجرب”
انفجر في الضحك قائلاً : تجربي فيا قصدك
“وفيها إيه.. انت اللي قدامي وبصراحة لقيت نفسي فاضية قولت اعمل حاجة مفيدة.. ويالا بقا”
أومأ لها ولا زالت الابتسامة تزين ثغره
” طيب ثواني وهحصلك”
خرجت من الغرفة وبدل هو ثيابه وتبعها للخارج ليجدها تضع الاطباق على المائدة
جلس وجلست امامه عينيها مرتكزة عليه بلهفة في الاستماع لرأيه
رفع رأسه نحوها ضاحكاً : ايه يا لين بتبصيلي كدة ليه؟
“مستنياك تدوق وتقولي رأيك”
اقترب بوجهه من الطبق هامساً : ريحته حلوة
رفع الملعقة يتذوقه بتلذذ : اممم طعمه حلو قوي
وعاد يتذوقه مرة ثانية
“بجد طعمه حلو قوي.. انتِ متأكدة انك انتِ اللي عاملة الاكل دا”
أومأت بسرعة : اه والله انا
“دا اكل مايعملوش غير محترفة طبخ”
تهللت اسريرها بسعادة وشرعت في تناول طعامها اسفل نظراته المندهشة وابتسامته
لقد استطاعت بعفويتها محو حزنه بسهولة.
***
انتهوا من تناول الطعام ونهض يساعدها في حمل الاطباق للداخل
” صحيح انتِ جيبتي الأكل دا منين انا فاكر ان التلاجة ماكنش فيها حاجة ”
اجابته بعفوية لم تدرك انها ستغضبه
“نزلت اشتريت كل حاجة”
ألتفت لها بغضب : نزلتي.. نزلتي فين؟
“السوبر ماركت اللي تحت”
القى الأطباق من يده بعنف هاتفاً : انتِ ازاي تنزلي لوحدك من غير ماتقوليلي.. وياترى قابلتي مين بقا في سكتك
رمقته بتعجب من غضبه المفاجئ : في ايه ياعُدي.. السوبر ماركت تحت البيت على طول نزلت جبت اللي محتاجاه وطلعت فوراً ماتأخرتش
