رسم ابتسامة 2
“رُبا… ازيك ياحبيبتي.. وانا عمالة اسأل نفسي ازاي لينا ماتعزمش صاحبتها الوحيدة على كتب كتابها”
دارت عينيها بينهم بعدم استيعاب :كتب كتاب!!! كتب كتاب مين؟؟
” عُدي ولينا..”
ثم تابعت وهي تضع الكوبين على المائدة ولم تنتبه لملامحها : هروح اجيبلك عصير
رفعت رُبا عينيها له سائلة : كتب كتاب مين ياعُدي؟
اخفض رأسه بأسف فنظرت لـ صديقتها تشير لها : انتِ اتجوزتي عُدي؟
وضعت لينا كفها على فمها ثم اجهشت في البكاء فـ رمقتها بذهول وعادت له تصرخ به : ساكت ليه.. ماتفهمني
رفع عينيه لها يتسلح بالهدوء : ايوة يا رُبا.. انا ولينا اتجوزنا وهنسافر اخر الأسبوع
تجمدت.. عينيها تمتلئ بالدموع دون ان تشعر
ترمقهما بنظرة واحدة..
تغمض عينيها بقوة ف تنساب الدموع بغزارة
ما يحدث ما هو إلى مزحة سخيفة
سيضحكا الآن ويخبرانها انهم كانوا يمزحان معها ثم تعود الأمور لما كانت
حركت رأسها بعنف هامسة : انت… انت بتهزر صح
مسح وجهه بكفيه متمتماً : لا يا رُبا.. انا مش بهزر
“طب وانا..!!! كلامك… ووو.. ومشاعرك.. كل الكلام دا معقول كان… كان كذب”
لم يستطع اجابتها فألتفتت لـ لينا : طب هو وكداب.. لكن انتِ… انتِ ياصاحبتي
نهضت لينا ودموعها تغرق وجهها تقترب منها
“رُبا.. الحكاية مش زي مانتِ فاهمة”
ابتسمت بسخرية مريرة : فهميني.. فهميني ياصاحبة عمري.. فهميني ايه اللي يخليكِ تتجوزيه.. ولا عمار مات ف تاخدي اخوه عادي
“رُبا”
هتف بها فألتفتت له ليتابع : اللي حصل حصل.. وكل شئ قسمة ونصيب
ضحكت بخفة يعلم انها تخفي خلفها الكثير من الألم
” انا مش مصدقة حقارتك بجد.. انا ازاي كنت مخدوعة فيك كدة”
لم تتحمل لينا اتهامها له بالحقارة ف هتفت مسرعة : رُبا عُدي اتجوزني عشان..
“اخرسي انتِ خالص” صرخ بها قبل ان تكمل حديثها ثم استدار لـ رُبا مكملاً : خلصتي يارُبا
ألقت عليهم نظرة أخيرة غاضبة : انتوا الإتنين ازبل من بعض.. انا مش عايزة اعرفكوا تاني
تركتهم وركضت للخارج وهو يتابعها بألم
يرفض تلك الصورة التي وضعته بها لكنه لا يستطيع اخبارها.. لن يجاذف بسمعة الحمقاء الأخرى
“أنا اسفة.. انا كنت عايز افهمها”
دون ان يستدير لها هامساً بغضب : انا.. مش عايز اسمع صوتك.. كل اللي حصل دا بسبب غبائك
ورحل هو الأخر وتركها تبكي بشدة
هو ليس مخطئ في ما قاله..
نعم هي السبب فيما يعانوا..
ليتها ترحل من عالمهم حتى ترتاح ويرتاح الجميع
