رسم ابتسامة 2
رفعت عينيها تنظر له وإلى كفها المُحتجز بين كفيه
سحبته ببطئ هامسة بدهشة : انت بتقول ايه؟
“بقول اني بحبك.. وعايز اتجوزك”
انفجرت في الضحك بينما تغضن جبينه بضيق : ممكن افهم ايه اللي بيضحك قوي كدة
توقفت تجيبه : النكتة اللي انت قولتها.. مش دي نكتة بردو..
هتف بغضب : اكيد مش نكتة يامريم.. انا بحبك بجد
“بتحبني ايه يابني انت مجنون.. انا اكبر منك ب6 سنين.. وكمان انت تعرفني من امتى عشان تحبني”
عاد يمسك بأناملها : مش مهم.. كل دا مش مهم.. المهم اني بحبك بجد.. مريم والله العظيم انا اول مرة احس الاحساس دا مع واحدة.. انا عمري ما كنت بتاع حد وهبل من دا.. اللي بكون عايزه من الست باخده من غير حاجة.. بس انتِ حاجة مختلفة
حركت رأسها بجنون : انا مش مصدقة اللي بسمعه دا.. دا جنون.. عمار انا استحالة احبك
“ليه.. صدقيني انا هعرف اخليكِ تحبيني”
نفت قائلة : استحالة.. انا مش ممكن اوافقك ع المهزلة دي. ومن فضلك ياريت تبطل تكلمني
نهضت لترحل فأمسك بيدها يمنعها : انا مش هيأس ومش هبطل اكلمك
زفرت بقوة ثم استدارت راحلة.
***
وقف أمام المطعم بعد تفكير ليلة كاملة.. سيعلمها بكل شئ ويثبت لها صدق مشاعره نحوها
دلف ليجدها تتحرك بين الموائد وقبل ان يهتف بها وجد من يقف امامه
“عمار!!! انت بتعمل ايه هنا”
اجابه وهو ينظر خلفه حيث تلك المصدومة من مجيئه
“اهلا يارامز… انا جاي لمريم”
ألتفت لها ف تقدمت منه
“اهلا ياعمار.. خير في حاجة”
ثم نظرت لرامز سائلة : انتوا تعرفوا بعض!!
اجابها عمار بهدوء : رامز يبقى صاحب اخويا
ارتبك رامز واستئذن منهم راحلاً ف رمقته هي بغضب
“ايه اللي جابك هنا يا عمار.. احنا مش متفقين ماتجيليش شغلي”
امسك بكفها هامساً : مريم.. انا لازم اتكلم معاكِ ضروري.. في حاجات كتير لازم تعرفيها
فتحت فاهها لتعترض فقاطعها : ارجوكِ اسمعيني الأول وبعدها اعملي اللي انتِ عايزاه
***
استقل السيارة بجانبها لتقترب منه تطبع قبلة على وجنته
” صباح الخير”
” صباح ايه احنا المغرب. معقول يازياد نايم كل دا”
نظر لها بإبتسامة : وماكنتش ناوي اصحى.. ممكن اعرف مصحياني ليه
ادارت السيارة تجيبه : هتعرف حالاً.. عملالك مفاجأة
وقادته حيث مطعم رامز.. توقفت امامه بالسيارة ليبتلع لعابه بعسر سائلاً : احنا بنعمل ايه هنا؟
اجابته وهي تهبط من السيارة : انزل بس وهتعرف
