اعلن 3
أفاق مجد من أفكاره التى تعلقت كلها بتلك المخلوقة التى ملكت كيانه..وهو ينظر إلى هاجر بإبتسامة هادئة قائلا:
-مشفتش حماتى بس أكيد كانت هتحبنى..متجمعين على الخير دايما يارب.
قال الجميع:
-آمين.
إقترب منهم لتسرع سماح بإحضار طبق له..جلس إلى الطاولة ونظر إلى الطعام الذى وضعته له سماح فى طبقه ،سمى بالله وأخذ أول إصبع محشى فى فمه يلوكه ،تجمد لثوان قبل أن يستكمل مضغه وبلعه ثم نظر إلى عيون سمر مباشرة قائلا بنبرة تقريرية:
-انتى اللى طابخة.
تأملته فى دهشة قائلة:
-عرفت إزاي؟
قال حسن بمزاح:
-أكيد من طعمه الحلو..محدش من اخواتى بيطبخ بالحلاوة دى.
ضربته سماح على رأسه بخفة..بينما لا تدرى سمر لم ظهر فى عيون مجد نظرة حنين لم تفهمها ..لم يعقب على كلمات أخيه وإنما إكتفى بكلمة:
-تسلم إيدك.
أومأت برأسها فى خجل ..تشاهده يأكل كما لم تشاهد أحد من قبل وكأن كل لقمة تمنحه حياة.
********************
كانت الفتيات يضبن الطاولة حين خرجت سمر الأخت من حجرتها تقول بسعادة:
-باركولى ..هبتدى الشغل من بكرة.
بارك لها الجميع..لتقول:
-سيبوا اللى فى ايديكم ده..أنا اللى هلم السفرة وأعملكوا أحلى كابتشينو ..أنا عارفة ياهاجر انك بتحبيه زيي ،حسن قاللى.
نظرت هاجر إلى حسن بسرعة فوجدته يبتسم بهدوء لتبتسم بدورها..قالت سماح:
-طيب ابقى طلعيهولنا فوق ياسمر..أنا هطلع أطمن على مراد وأشوفه صحى ولا لأ،وكمان ماجى هترتاح شوية،وهننزلكم تانى..متمشيش ياسمر انتى وهاجر السهرة النهاردة صباحى وفيها فيلم رعب وتسالى كمان.
قالت سمر الأخت بدهشة:
-سماح وفيلم رعب ..طب تيجى إزاي دى؟
إبتسمت سماح قائلة:
-أهى جت وخلاص..يلا سلام مؤقت.
ثم غادرت تتبعها ماجى..لتقول سمر الأخت:
-هروح بقى أعمل الكابتشينو.
قالت لها هاجر:
-جاية معاكى هعلمك إزاي تعملى الرغوة بسهولة جدا.
قالت سمر الأخت بسعادة:
-تعالى تعالى..شكلنا هنبقى أصحاب أوى.
قال حسن:
-طب استنوا ،أنا جاي معاكوا عشان أتعلم برده..أمال ..العلام حلو مفيش كلام.
قالت سمر الاخت بمزاح ساخر:
-تعالى ياأخويا..عشان تبقى تعملهولى ..أختك دكتورة والفترة الجاية مش هبقى فاضية خالص.
قال حسن بسخرية:
-آل وأنا فكرت لما تيجوا هنرتاح بقى..أتارينى كنت بحلم.
ضربته سمر الأخت بخفة على رأسه قائلة بمزاح:
-أحلامك هتتقلب كوابيس على إيدى ياأبو على.
