اعلن 3
********************
تأمل مجد ملامح سمر المتوترة..ويديها اللتان تفركهما ..يود لو مد يديه وضمهما ليمنحها الأمان الذى يشعر بأنها تفتقده الآن…
أفاق من أفكاره على صوتها المضطرب وهي تقول:
-أنا..أنا آسفة.
نظر إليها بحيرة ..فعلام تتأسف تلك الرقيقة الخجولة..لتبتلع ريقها بصعوبة وهي تنظر إلى ملامحه مستطردة:
-آسفة يعنى لو كنت كلمتك بأسلوب بارد لما جيت تسألنى عن هاجر..بس الحقيقة أنا كنت مخنوقة شوية وي….
قاطعها قائلا بلهفة:
-مخنوقة من ايه؟فيه حاجة حصلت؟
هو مهتم بها..بمشاعرها..تبا..كم يضعفها اهتمامه..وكم يغمرها بالذنب..لتقول بارتباك:
-لا أبدا..سوء تفاهم بس .
زفر بإرتياح ثم قال:
-سوء التفاهم ده مشكلة.. ممكن يهدم أسرة بحالها ويضيعها.
تنهدت قائلة:
-والتجاهل وعدم الاهتمام..هم كمان ممكن يضيعوا أسرة.
تأملها قائلا:
-تقصدى جوزك مش كدة؟
نظرت إليه قائلة:
-رغم انى مش فاكرة من حياتى غير أحاسيس..بس الأحاسيس دى بتموتنى..كنت بحبه..أنا متأكدة انى كنت بحبه زي ما انا متأكدة انه كمان بيحبنى..بس خانى.
قال فى صدمة:
-خانك؟؟
تنهدت بعمق قائلة:
-الخيانة مش بس جسدية..الإهمال خيانة،التجاهل خيانة..ونسيان الوعود خيانة،صحيح كنت متجوزة بس محستش انى متجوزة..كانت الوحدة بتقتلنى،وكنت ساعات مبعرفش أنام من الرعب..كان عندى خوف دايم من إنى أفضل طول العمر لوحدى،كنت بخاف أحس وهو مش معايا..بخاف أفرح أو أحزن..بخاف أتعب وهو مش معايا..بخاف أموت وهو ….
قال مجد بلهفة امتزجت بألم :
-بعد الشر عنك.
ابتسمت بمرارة قائلة:
-حتى مجاملة زي دى، مبقتش أستناها منه..لانى أصلا مش فى باله،كل اللى فى باله الشغل وبس..أما أنا فديكور،بيفتكرنى وقت مايحب ويفتخر بية وقت مايحب وينسانى ويسيب تراب الاهمال يتراكم علية برده وقت مايحب.
قبض مجد على يده بقوة وهو يشعر بكم الوجع فى نبراتها..اذا.. كان هذا شعور حبيبته زوزا..كم كان غافلا..يود لو يعود به الزمن ليصلح أخطاءه ولكن مجددا الزمن لا يعود.
لاحظت سمر توتره لتمد يد مترددة تلمس بها ذراعه قائلة:
-أستاذ…
انتفض فأبعدت يدها بسرعة..تنظر له بدهشة.. ليقول بتوتر:
-آسف بس غصب عنى لقيتنى بروح لحياتى وبشوفنى بالظبط شبه جوزك وكأننا نسخة واحدة.
نظرت إليه بدهشة لتشوب نبراته الحزن وهو يقول مستطردا:
-كنت زيه تمام،واخد حبيبتى شيئ مسلم بيه بعد الجواز..مفكرتش يوم أقولها كلمة حلوة،مرحمتهاش مرة مثلا وقلتلها كفاية شغل بقى انتى تعبتى النهاردة أو تعالى نتغدى برة..أفرحها ..ماهي كل يوم بتقف فى المطبخ طول النهار عشان بس تسعدنى،مفكرتش أتكلم معاها أو أسألها أحلامها ايه واحققهالها زي ماكانت بتحققلى احلامى من غير ما أتكلم..ولما كانت بتتعب بجد مكنتش بتخبى عنى لانى أصلا مكنتش شايفها وسط شغلى وملفاتى اللى بجيبها البيت وباخد فيها من وقت مراتى اللى المفروض يكون اهتمامى بس فى الوقت ده ليها..قصرت معاها كتير ومحستش بده غير لما راحت منى.
