اعلن 3
إبتسمت بهدوء..ليقترب ويجلس أمامها قائلا :
-إزيك دلوقت؟
أدركت أنه يسألها عن حالتها النفسية بعد تلك المأساة التى غيرت حياتها..لتتعجب من نفسها فبداخلها لا أثر للحزن أو الرثاء على حالها،فقط الفراغ..الخواء الكامل هو ماتشعر به..لتتنهد قائلة:
-أنا كويسة..أكيد محتاجة وقت عشان ألملم فيه نفسى وأقدر أتخطى أزمتى،بس الأكيد انى واثقة فى إنى هقدر،طول ما انتوا حوالية..بجد وجودكم جنبى فرق كتير..فرق كتير أوى.
ابتسم بارتياح قائلا:
-الحمد لله..هي دى سماح اللى أعرفها.
تراجعت تستند الى ظهر مقعدها قائلة بإبتسامة:
-قصدك اللى خنقاك ماجى ليل ونهار بالكلام عنها.
إبتسم وهو ينهض قائلا:
-انتى الأخت اللى معرفتش غيرها ياسماح..ربنا يخليكى ليها.
قالت سماح بابتسامة واسعة:
-ويخليها لينا.
إتسعت إبتسامته قائلا:
-يارب..أنا همشى دلوقت ولو احتجتينى رنى علية.
أومأت برأسها مبتسمة..ليغادر بهدوء تتبعه عيونها قبل أن تقول :
-صحيح..الوفاء والإخلاص فى الزمن ده بقى عملة نادرة،بس الحمد لله ربنا كرمنى بعيلة زي دى..محاوطانى بالحب والاهتمام والاخلاص اللى عوضنى عن كل حاجة وحشة حصلتلى فى حياتى..
لترفع رأسها إلى السماء قائلة بتضرع:
-يارب إحفظلى عيلتي وإبعد عنى كل خاين ملوش أمان…يااارب.
********************
مرت الأيام بطيئة على أبطالنا يحاول كل منهم أن يرى فى فرصته الجديدة.. حياة ،ماعدا هذا الذى كان يجلس على كرسي إلى جوار سريرها..هذا الذى توقفت حياته تماما بغيابها ..كان يمسك بيدها بين يديه،يتأمل ملامحها الساكنة بدموع ربضت بعمق عينيه..يقول فى مرارة:
-أسبوع بحاله وانتى رافضة ترجعيلي..ترجعى للى حبك من كل قلبه ومستعد يفضل طول العمر مستنيكي،أسبوع بحاله ياحبيبتى وانتى هربانة فى غيبوبتك من واقع رفضاه..واقع مكنش ليكى أي ذنب فيه،فى الأول والآخر كنتى انتى الضحية.
رفع يدها إلى شفتيه يقبلها ثم قال بعشق:
-عشان خاطرى إرجعيلى ،قلبى مبقاش حمل فراقك..قلبى واجعنى أوى،أوى ياحبيبتى..انتى عارفة،أنا عمرى ما كنت أتخيل إنى هحب حد بالشكل ده.. أنا بحبك بجنون ومستعد أموت لو بموتى هتفوقى وتبقى كويسة.
تنهد بحزن عندما رأى دمعة تسقط على وجنتها من خلال أهدابها المغلقة..ليشاركها بدمعة سقطت على وجنته بدورها قائلا:
-حتى وانتى فى غيبوبتك بتنزل دموعك بسببي..الظاهر ان وجودى فى حياتك بيتعسك وبس،بيإذيكى وبس..وأنا مبقتش قادر أتحمل أشوفك بالشكل ده،مبقتش قادر أتحمل فكرة إنى السبب فى ألمك،لدرجة انى بفكر أعمل حاجة مكنتش أتخيل انى فى يوم هعملها..الظاهر إنى لازم أبعد عنك عشان تقدرى تكونى سعيدة..مش يمكن لو بعدت تفوقى وتبقى كويسة.
