اعلن 3
أطرق برأسه قائلا بحزن:
-لأ..مش هقول أي حاجة من دى..انتى صح؟واللى شافته عيونك مش وهم..حقيقة.
تراجعت خطوة إل الوراء بصدمة قائلة:
-يعنى انت بتعترف إنك خنتنى؟
رفع إليها عيون دامعة وهو يقول:
-غصب عنى..دى حاجة مش بإرادتى..أنا مريض ياهاجر.
عقدت حاجبيها مرددة :
-مريض!!
قال بحسرة:
-أيوة وبتعالج نفسيا..بقالى فترة.
إزداد إنعقاد حاجبيها..ليتنهد قائلا:
-الحكاية ابتدت لما حبيت بنت حب كبير..كبير أوى..كان إسمها نورسين..وكنا مع بعض دايما مبنتفارقش ،دخلنا جامعة واحدة عشان برده نكون مع بعض،كانت حياتى ياهاجر..روحى اللى مقدرش أعيش من غيرها.
أصاب هاجر غصة فى حلقها وهي تشعر بألم فى هذا القلب الذى تنحره كلماته،بينما هو يستطرد بمرارة:
-وفى يوم فاجأت صديق لية بزيارة وشفتها عنده..واكتشفت إنها بتخونى وانها متجوزاه عرفى،ساعتها كان المفروض أموتها وأشرب من دمها..بس حبى ليها منعنى،نزلت من هناك بسرعة قبل ما أتهور..اكتشفت بعدها ان ده عملى مشكلة نفسية،لإنى مقدرتش أشفى غليلى منها،فجأة لقيتنى بشرب وبمشى مع بنات شبهها لمجرد انى أعلقهم بية وبعدين أخونهم بقسوة زي مااتعمل فية..بقى الشرب والخيانة إدمان،حاجة بتجرى فى دمى..لغاية ماعملت حادثة بسبب الشرب وأخدنى مجد بعدها لمصحة ..اتعالجت فيها فعلا من ادمان الكحول..بس..الخيانة ،أنا لسة بتعالج منها.
نظرت إليه بصدمة لا تدرى ماذا تفعل ..فبداخلها تسللت الشفقة إلى قلبها وامتزجت بمرارة إحساسها بالخيانة.
أطرق برأسه مجددا يخفى وجهه الذى تسللت إليه عبراته قائلا بندم:
-أنا عارف إن حالتى صعبة وانى مش بسهولة هتعالج..بس من ساعة ماشفتك وحبيتك وأنا حاسس إن الأمل فى علاجى كله على ايديكى..أنا حاسس انى بتغير بس محتاج شوية صبر..
ليمد يده يمسح وجهه..قبل أن يرفع إليها وجه متمزق من الألم قائلا:
-أنا عارف ان الموضوع صعب ياهاجر ..وانك مستحيل تتفهمى مرضى أو تتقبليه..بس لو لقيتى فى قلبك انك ممكن تصبرى معايا لغاية ماأتعالج..لو حبك لية بالقوة دى؟فأنا واثق انى معاك هقدر أرجع حسن بتاع زمان..وهكون أسعد راجل فى العالم.
نظرت إلى عيونه بحيرة امتزجت بالحزن.. لا تدرى ماذا تفعل..ثم أطرقت برأسها فقال بألم:
-أنا قلتلك على اللى جوايا ..عريت نفسى أدامك ..الحقيقة دى ميعرفهاش غير دكتورى ، ودلوقتى انتى كمان ..وهسيبك تفكرى،بس لازم أقولك ان وجودك جنبى هيفرق معايا كتير ،وانك الوحيدة اللى قدرت توصل لقلبى وتملك مشاعرى..الوحيدة اللى حبيتها بجد واتمنيت أقضى عمرى معاها ..الوحيدة اللى شفتك وكأنك نفسى ..جزء من ضلعى، وأنا آسف ان كنت سبب نزول دموعك..أكيد كسرتك بس وعد منى لو رضيتى نكمل إنى هجبر كسرك..أنا همشى دلوقتى ياهاجر وهستنى ردك..بس ياريت متتأخريش علية.
