اعلن 3
الفصل الثانى والعشرون.
دلفت سماح إلى حجرة طفلها فور عودتها من العمل بعد أن أخبرتها سمر بأن مراد عاد من المدرسة مكفهر الملامح وأنه رفض الطعام..
رأته جالسا على سريره يضم ركبتيه إلى صدره ويضع جبهته عليهما..إقتربت منه ينتابها القلق،جلست بجواره ووضعت يدها على رأسه قائلة بهمس قلق:
-مراد.
رفع رأسه يطالعها بوجه باك وعيون ظهرت العبرات فيهما..لتقول بجزع:
-مالك يامراد؟فيك إيه ياإبنى؟
قال مراد وهو يمسح دموعه:
-مفيش حاجة ياماما..مخنوق بس شوية.
قالت بحيرة:
-مخنوق من إيه؟إحكيلى..فضفضلى ياحبيبى.
نهض قائلا بعصبية:
-مش عارف..حاجات كتير خنقانى..حاجات جوايا مش عارف أتعامل معاها..فى الوقت ده الواحد مش بيحتاج أمه عشان يحكيلها ،بيحتاج أبوه وبابا……
ترك جملته معلقة ..لتنهض بدورها تقترب منه قائلة بحزن:
-انت متضايق يامراد منى عشان إتطلقت من باباك؟
قال على الفور:
-بالعكس ياماما..انتى خدتى القرار الصح..مكنش ممكن تعيشى معاه بعد ما هانك وضربك .
ليزفر مستطردا:
-بس المشكلة دلوقتى مبقتش فى بابا..بقت فية أنا..حاسس إنى بقيت شبهه..وإنى كل يوم ببقى هو..بتصرفاته وعصبيته..وكل حاجة اعترضت عليه فيها وده مخوفنى.
أصابت سماح غصة فى قلبها من هذا الخوف الذى استشعرته بنبرات مراد وهذا الإعتقاد لديه بأنه سيصير مثل أباه..لتقول بسرعة:
-باباك مش وحش يامراد ،صدقنى محدش فينا خالى من العيوب،وعموما انت مش شبه باباك يامراد..انت شبه خالك مجد،حنين وعاقل وبتاخد بالك من اللى حواليك..مبتفكرش فى نفسك أبدا..صدقنى انت مختلف كتير عن حسام.
طالعها مراد بخجل ظهر فى ملامحه وهو يقول:
-النهاردة ياماما..النهاردة شفت بابا فية وأنا بزعق لبنت فى المدرسة..صحيح هي اللى غلطت فية الأول بس أنا مكنش لازم أرد الإساءة بالإساءة..إتضايقت أوى ياماما من نفسى وخصوصا لما عرفت إنها يتيمة الأم.
عقدت سماح حاجبيها قائلة:
-لأ..انتى تحكيلى من الأول..لإنى مش فاهمة حاجة..
تنهد مراد قائلا:
-هحكيلك ياماما..هحكيلك من أول ما كنت رايح المكتبة بسرعة عشان ألحق أخلص قراية الكتاب وفى الطريق ….اتقابلنا.
********************
قال مرتضى بصدمة:
-ياآبا بس سعدية مش متعلمة ….
قاطعه الشيخ سالم قائلا بغضب:
-وهي عملتك السودا اللى عملتها فى إسكندرية كانت عملة متعلمين..والله الجاهل لو عملها كان هيبقى أرحم منك ..على الأقل متعلمش كتاب ربنا ولا فهم آياته..ساعتها بس هنقول أهله مربهوش،ولا عرفوه عقاب ربنا قبل عقاب الدنيا للعصاة ومرتكبين الكبائر،انت عارف يامتعلم عملتك دى لو أهلنا هنا عرفوها هيكون مصيرك إيه؟
