رسم ابتسامة 3

وضع حلقته بإصعبها تحت انظارهم
وبعد التهاني والمباركات تركهم الجميع لينفردا ببعضهم قليلاً

دلفت للشرفة وهو يتبعها.. استنشقت الهواء بقوة هامسة : الجو جوة خنقة قوي… صعبان عليا فرحتهم

أبتسم بهدوء يخبرها : فرحتهم حتى لو مؤقته ف هي مقابل اننا نريح دماغنا شوية من الزن ولا إيه

تمعن به للحظات ثم وجهت جسدها له سائلة : انت ليه مش عايز تخطب يابكر.. ايه السبب اللي مانعك ترتبط بواحدة بجد مش كدة وكدة وتفرح والدتك

اجابها بصمته ف تابعت بفطنة : الحكاية فيها ست وماضي

اقترب منها خطوة واضعاً يديه في جيب بنطاله : الحكاية فيها خيانة ، إنكار للوعود وقلة حيلة .. يمكن ييجي يوم واحكيهالك.. هتعجبك قوي.. اصلها ممتعة للي بيسمع لكن صعبة بالنسبالي
زيك كدة مش سهل تحكي..

ضحكت بمرارة : لا انا عادي كل الحكاية اني حبيت واحد ماينفعش احبه.. اهله رفضوني ف كان اجبن من انه يواجه ودلوقتي راجع عايز يعوضني عن اللي فات
تفتكر في حاجة ممكن تشفع وتعوض اللي عيشته
تعوض لحظة الوجع..
هو مهما يعمل مش هيقدر ينسيني السنين اللي عيشتها بعد ما سابني.

اجابها
” لأ.. للأسف مافيش”

ثم رمق الأسفل بنظرة عابرة وعاد لعينيها يتابع : بس لو لسة في حب.. في لهفة وشوق.. ممكن اللي جاي يعوض اللي ضاع

إستدار إلى الداخل ف ألتفتت للأسفل حيث نظر لتجده واقفاً مستنداً على حائط مقابل لمنزلهم
يشاهدهم من بعيد..
من خارج إطار الصورة.. يبدو له عاشقين يتحدثان
اصطدمت عينيها به
ظلت واقفة بصمت تتبادل معه النظرات
نظرات كانت تحكي الكثير قطعتها دمعة فرت من عينيه ف جففها بعنف واستدار راحلاً.

***

كانت تجلس تتناول العشاء حول المائدة مع عائلتها
وهاتفها بيدها تجري بعينيها على الإعلان امامها
مسابقة لأحسن مصور تابعة لشركة موضة عالمية
ومن يفوز سيتم تعيينه في هذه الشركة
برقت عينيها بحماس وهي تقرأ شروطها
مجموعة لقطات لملامح رجل
يمتزج بعينيه الكثير من مشاعر الحزن والشجن
قطبت حاجبيها بضيق.. من اين ستعثر على ذلك

“ماتاكلي يابنتي وسيبك من الزفت اللي ف ايدك دا”
وضعت الهاتف على المائدة بعد هتاف والدتها
ثم اخبرتهم ليحتج شقيقها
“يعني هتسيبي شغلك الحر وتروحي تقيدي نفسك بشركة.. انتِ هبلة ياكاميليا”

“دي شركة عالمية.. شغل ايه اللي بتتكلم عنه.. هو انا هفضل طول عمري اصور ف عرايس بس وكل فين وفين كمان”