رسم ابتسامة 3
رفعت حاجبيها بدهشة : كنتوا بتحبوا بعض؟
أومأ لها : من زمان.. كنا عايشين في بور سعيد في بيت واحد
وصمت لتحثه على المتابعة : وبعدين كمل.. احكيلي عنها
” بحبها من واحنا صغيرين بس ماعترفتلهاش بـ دا غير وانا ف ثانوي قالتلي وقتها ان هي كمان بتحبني وعيشنا بعدها ايام ماكنتش احلم بيها.. عارفة يامريم كنت بحس اننا واحد.. وكنت مستني اليوم اللي نتجوز فيه”
ثم ابتسم بحنين مردفاً : عملنا حاجات مجنونة مع بعض كتير.. كنت بهربها من المدرسة عشان نخرج سوا وافسحها وبالليل والكل نايم كنا نطلع نقعد ع السطح لحد الصبح ننزل ننام ساعة ونصحى نروح المدرسة سوا
اغلب اليوم كنت بقضيه معاها.. كنت بسيب مذاكرتي واقعد اذاكر ليها وجبت مجموع قليل في ثانوي بس الحمدلله لحقت تجارة انتساب ولما جبت ف اول سنة امتياز بقيت انتظام
لحد ما ف يوم اتصلت بيا وانا ف الجامعة وكانت بتعيط جامد لدرجة ماكنتش فاهم هي بتقول ايه
سيبت محاضراتي وجريت عليها لقيتها بتقولي ان عمي مش عايز يخليها تكمل تعليم.. اتكلمت معاه واقنعته ودخلت كلية الطب”
اومأت له وهي لازالت لا تعرف اين تكمن المشكلة فتابع
” وقتها كنت اتخرجت وبدأت ادور على شغل.. بس كل البيبان اتقفلت في وشي.. واكتئبت لدرجة اني بنيت اوضة فوق السطح وقعدت فيها مابقتش بشوف حد غيرها
هي الوحيدة اللي كنت بسمح لها لحد ما بعدت هي كمان”
قطبت حاجبيها بتساؤل : بعدت ازاي وليه؟
“دا السؤال اللي سألته لنفسي كتير وقتها.. ايه اللي بيحصل.. ايه غيرها وبعدها عني لدرجة كانت بتنساني ونتقابل صدفة على السلم مثلاً
وفي يوم يأست من كتر التدوير ف الشركات اللي عايزين محاسب خبرة على الأقل تلات سنين
بقيت ادور على اي شغل.. عشانها هي ولقيت شغلانة جرسون في مطعم.. روحت قدمت واتقبلت واول يوم روحت فيه…”
صمت مع اجتياح الذكرى.. لن ينسى ذلك اليوم مهما عاش ف شعر بربتتها على كفه
” أول يوم روحت فيه وأول ترابيزة كانت هي اللي قاعدة عليها مع واحد.. ”
شهقت مريم بعنف : واحد؟!!!!
أومأ لها : واحد طلع معيد عندها ف الكلية.. كانوا قاعدين يتكلموا وماسك ايديها كأنهم يعرفوا بعض بقالهم عمر.. لما شوفتها حسيت اني اتشليت يامريم.. ماتحركتش من مكاني لحد ما المدير نبهني.. وصلت عندهم ولما شافتني ماتكلمتش.. ماقدرتش اكمل سيبت كل حاجة وروحت ولما رجعت طلعتلي الأوضة وهي بتعيط اعتذرت بس ماقدرتش اسكت زعقت وضربتها بالألم ساعتها قالتهالي في وشي..
انا دكتورة لما افكر اتجوز هتجوز دكتور زيي مش عاطل أو جرسون في مطعم..
