رسم ابتسامة 3
صمت لثواني لا يعرف ماذا يقول لها.. لكنه ربت على كفها بمواساة : هو دا بس اللي ضايقك ؟
رفعت عينيها تنظر له بتوجس ثم حركت رأسها نافية فـ تابع وهو يحاول كبح غضبه : معاذ قالك حاجة زعلتك صح؟
شهقت ببداية بِكاء : قالي حاجة وجعتني.. عرفتني قد ايه انا كنت غبية قوي وساذجة
“بخصوص عمار”
أومأت له ثم ضمت ركبتيها تفضي بما يعتمل بصدرها : انا كنت بحبه قوي ياعُدي.. من واحنا صغيرين، كنت بحس انه اقرب واحد ليا.. او يمكن عشان كنت بحبه كنت بحس بكدة مش عارفة.. بس كل اللي كان ف بالي اني اخليه يحبني زي ما بحبه.. كنت بشوفه بيتبدل لواحد غريب.. بيتمرد على كل حاجة
وبدل ما اخاف ابعد انبهرت.. حاولت الفت نظره ليا.. بقيت اعمل زيه والبس قصير.. اتدلع.. كنت فاهمة ان دي حاجة هتبسطوا بس الغريبة انه كان هو اللي بيوقفني ويزعقلي
تنهدت بعنف ودموعها تغرق وجهها
“لحد يوم عيد ميلادي في الحفلة.. كنت عارفة ان عينه عليا طول الوقت بس لما طلعت اوضتي ولقيته ورايا اترعبت وكل اللي كان ف دماغي اني اهرب منه خصوصاً وانا شايفة نظرته الغريبة ليا بس هو بكلمة واحدة محى الشعور دا.. قالي انه ماجبليش هدية بس هياخدني اسهر معاه، فرحت جداً وخرجنا سهرنا قالي ان النهاردة ليكِ انك تعملي كل حاجة انتِ عايزاها تشربي وترقصي براحتك.. عملت كدة.. شربت كتير قوي وماحستش بنفسي غير تاني يوم الصبح ”
ابتلعت لعابها بعسر واخفضت عينيها ف فهم المغزى من حديثها
“روحت له الجامعة.. زعقت وقولتله ازاي يعمل كدة، قالي ان انا اللي طلبت ووراني فيديو مصوره ليا، كنت غريبة قوي بس للأسف صدقته خصوصا اني بحبه وكنت تحت تأثير الخمرا اللي شربتها… بس اللي عرفته النهاردة انهم حطولي منشطات جنسية ف الكاس”
ثم اجهشت في بكاء اوجع قلبه : انا عارفة ان كل دا ماينفيش اني مذنبة وان كل اللي حصل بعدها كان بإرادتي.. بس ليه يعمل فيا كدة
جذبها لحضنه بصمت فأبتعدت تنظر له ويبدو ان ذلك اليوم سيظل محفوراً بداخله من كثرة ما اعترفت به
” انت عارف يوم ماقولتلك اني حامل وحسياك مش فرحان… فكرتني بيه يوم الحادثة لما قولتله نفس الكلام عارف قالي ايه.. قالي روحي شوفي مين ابو اللي في بطنك”
ضم قبضته بقوة لا يعرف مِن مَن سيقتص لها
عاد يضمها له يربت على خصلاتها ثم ينظر لوجهها وعينيها المنغلقة : حاولي تنسي يا لينا… ماتفكريش في الماضي
