رسم ابتسامة 3
نهض مراد هو الأخر : طب بلاش.. ادخل غير هدومك واغسل وشك.. تعالى نخرج نتمشى شوية عايزك ف موضوع مهم
“ماشي بس يارب الموضوع مايبقاش له علاقة بأختك المجنونة”
حك رأسه من الخلف : هو.. هو بصراحة ليه علاقة
عاد يوسف يجلس على الأريكة : خلاص يبقى مش نازل
“يايوسف.. اسمعني.. كاميليا مكتئبة ، وانا أول مرة اشوف اختي كدة”
هتف يوسف بغضب : وانا مالي يامراد.. تروح تشوف واحد تاني.. هو خلاص مافيش حزين غيري
” طب ممكن تسمعني.. الصور دي ماحدش هيشوفها غير الحكام مش هتتنشر وانا اتأكدت من الموضوع دا بنفسي.. يوسف فاضل كام يوم والمسابقة تنتهي أرجوك ساعدها وانا هشيلهالك جميلة طول عمري”
اخفض رأسه بعجز يضعها بين كفيه يفكر.. لما هو معترضاً من البداية.. كل ما في الأمر عدة لقطات وينتهي
رفع عينيه له : تمام.. كلمها وقولها اني موافق بس بشرط ماشوفش وشها تاني.
***
استيقظت تجلس على الفراش
تفرك عينيها بنعاس وتدور بهما في الغرفة ف تلمح خلو الفراش جوارها
قطبت بتعجب ف اليوم عطلة
إلى اين ذهب في ذلك الوقت !!
كادت تنهض لكنها وجدته يفتح باب الغرفة ويدخل يحمل بيده قالب من الكيك وبيده الاخرى هاتفه
“Happy Birthday to You”
رفعت حاجبيها بدهشة
اليوم ذكرى ميلادها التاسع عشر؟!!
لم تتذكره..
وهي التي كانت تنتظر ذلك اليوم من قبل
لكن الآن ومع ذكرى مولدها السابق لا تريد لهذا اليوم ان يأتي مجدداً
أقترب يجلس بجانبها على الفراش ويوجه الهاتف لها
“اهي ياخالتو وعملت زي ماقولتيلي”
امسكت الهاتف بلهفة تحادث والدتها التي هتفت
“لينو حبيبتي.. كل سنة وانتِ طيبة ياروح ماما.. اول عيد ميلاد يعدي وانتِ مش معايا”
سقطت دمعة من عينيها
“وانتِ طيبة ياماما.. وحشتيني قوي”
“وانتِ كمان ياروحي.. خلاص هانت كلها ايام وترجعيلي”
حشر نفسه بينهم قائلاً : ترجعلك فين ياخالتو خلاص راحت عليكِ
ابعدته بإبتسامة لكن والدتها هتفت بغضب : انت فاكر انك خدتها مني ياواد انت.. دا اول ماترجعوا هتيجي تقعد معايا لحد ما اشبع منها
ضحك بخفة فتابعت : يالا هسيبكم تحتفلوا دلوقتي
ودعتهم واغلقت لتنظر لينا له ف طبع قبلة على وجنتها
“كل سنة وانتِ طيبة”
“ميرسي ياعُدي..”
قال وهو يتناول القالب : بصراحة انا ماكنتش فاكر.. خالتو اللي فكرتني امبارح بالليل ف قررت احتفل بيكِ على طريقتي.. عارفة لو كنا ف مصر كنت عملتلك حفلة احلى مية مرة من اللي ابوكي بيعملهالك
