رسم ابتسامة 3
ثم ابتسم بألم : واتجوزت فعلا ف سيبت البلد كلها وجيت هنا وبشتغل مع رامز بقالي خمس سنين
شعرت بالغضب من أجله.. لأجل من تركت تلك الحمقاء حب عمرها والسؤال الأهم لما عادت الآن
“وايه اللي رجعها دلوقتي؟”
رفع كتفيها بجهل : مش عارف ومايهمنيش اعرف
“غريبة مع ان شكلك وانت بتتكلم عنها يقول انك لسة بتحبها”
اتسعت ابتسامته : فعلاً.. انا لسة بحبها ماقدرش انكر ، دي حب عمري يامريم.. انا لحد دلوقتي ماتجوزتش عشان مش متخيل نفسي متجوز واحدة تانية
حل الصمت على الجلسة واخذت هي تعبث بالطعام امامها
“تعرفي اني فكرت فيكِ قبل كدة وكنت عايز اخطبك”
رفعت عينيها له بصدمة فتابع : وفاتحت علياء في الموضوع بس قالتلي آجله شوية.. ماكنتش فاهم السبب
حركت رأسها بتساؤل : ليه؟
تأملها للحظات ثم اجابها : فيكي منها كتير قبل ما تتغير
التوت شفتيها بإبتسامة مريرة
لما على العاشق ان يعاني كل تلك المعاناة
ربتت على يده بحنو تخبره : انت تستاهل كل حاجة حلوة يابكر
واستكملا طعامهما في جو مشحون بذكريات الماضي المؤلمة.
***
أوصلها للمنزل وفي طريقه إلى منزله صدح هاتفه فـ رفعه ينظر للرقم المجهول بجبين متغضن ثم فتح الخط ليصله صوتها
“ماجتش ليه يابكر؟”
زفر بقوة هاتفاً : عايزة ايه يا أسمهان..
“عايزة اتكلم معاك.. لازم اتكلم معاك ضروري يابكر أرجوك”
تلفت حوله ثم تذكر انه ترك الورقة المدون بها عنوانها بالمكتب ف تنهد بضيق قائلاً
“ابعتيلي العنوان”
***
أملته العنوان وجابت بهو المنزل بتوتر..
هذه المواجهة تأخرت كثيراً
والآن حان موعدها..
كان قلبها يخفق بعنف حتى كاد صوت دقاته تصم اذنيها
استمعت لصوت الجرس ف ركضت نحو الباب وقبل ان تفتح عدلت هيئتها في المرآة
وجدته أمامها يرمقها بغموض ف افسحت له المجال للدخول بإبتسامة مشتاقة
“اتفضل يابكر”
دلف ببطئ يقف ينظر للبهو الواسع أمامه
منزل راقي بذوق ناعم يشبه ثوبها الأخضر الذي ترتديه الآن
ابتسم بسخرية ف اقتربت منه بصوتها الهادئ تشير للداخل : مش هتقعد
إستدار لها بذات الإبتسامة : افضل انك تقوليلي عايزة ايه بسرعة .. دا مش مكاني
“ماشي يابكر هقولك بس اقعد ماينفعش نفضل واقفين كدة”
زفر بضيق ودلف يجلس على اول مقعد قابله ف اسرعت للداخل تسكب كوبين من العصير وتعود له
تضع واحداً أمامه ف هتف بسخرية : اووه الدكتورة أسمهان جيبالي العصير بنفسها
