رسم ابتسامة 3
اغلقت الهاتف وبعقلها خطة محكمة وشخص واحد فقط يستطيع اقناع زياد.
***
يجلس في المقهى كعادته يمسك بورقة وقلم لأول مرة منذ سنوات..
كان لتوه يحادث أروى المتوترة من مقابلة فؤاد لأخيه
اغلق معها وألتقط انفاسه ثم بدأ في تدوين اول سطور لروايته الجديدة
اندمج بها بشغف حد انه لم ينتبه لتلك التي جلست تتأمله ووضعت باقة من الورود امامه
رفع رأسه يمسد رقبته ف رأها
“كاميليا!! بتعملي ايه هنا؟”
اجابته مبتسمة : جاية اشوفك واديك الورد والهدية دي
رمق الاطار المغلف امامه والورود البيضاء ثم رفع عينيه لها بتساؤل : ايه المناسبة؟
“انا فوزت بالمركز الأول.. والفضل كله يرجعلك..”
حرك رأسه نافياً بإبتسامة هادئة : غلطانة ياكاميليا.. انتِ اللي موهوبة بجد وتستحقي اللي وصلتيله
“طيب ممكن تاخد الورد والهدية.. هتعجبك قوي والله”
امسك بالأطار يتفحصه من الخارج : دي صورة ولا ايه؟
لمعت عينيها بحماس : افتحها وشوفها
فتحها ليجدها صورة من تلك الصور التي التقطتها
حيث ينظر إلى الفراغ بجانبه بحنين
لكنها وضعت الاختلاف الذي اربك قلبه
ف قد ملئت الفراغ بصورة زوجته الراحلة وببعض التأثيرات ظهرت كأنها حقيقية للغاية كأنه ينظر لها
ولم تدرك هي انه وقتها كان يتخيلها بالفعل
لم يستطع رفع عينيه عن الصورة.. يتأملها بإشتياق
انامله تسير فوق ملامحها بلهفة
“عجبتك؟”
صوت كاميليا اخرجه من حالته ف نظر لها بإبتسامة : عجبتني.. جميلة قوي
ثم وضعها امامه : متشكر يا كاميليا
“انا اللي المفروض اشكرك ع اللي عملته معايا.. بس عايزة منك خدمة”
رفع احد حاجبيه : خدمة ايه تاني؟
ضحكت برقة : لا مش اللي فهمته.. انا عايزة نبقى صحاب ، لو تسمحلي يعني
انتقلت عينيه بينها وبين الصورة ثم قال مبتسماً : لو هتعمليلي كل مرة مفاجأة حلوة زي دي.. ماعنديش مانع.
بادلته الإبتسامة
” بس كدة من عينيا.. يالا بقا اطلبلي أكل”
***
استيقظت تجلس على الفراش ترمق وقفته امام المرآه بإبتسامة وهو يعدل من قميصه للمرة العاشرة وبكل مرة يجد شيئاً ناقصاً او هكذا يظن
ضحكت بخفوت ونهضت تقترب منه فألتفت لها بحاجبين معقودين : صباح الخير
مسدت جبينه برقة ثم رسمت ابتسامة على شفتيه : كدة يبقى صباح الخير
تنهد بيأس يخبرها : حاسس ان في حاجة غلط
تأملت هيئته ثم ألتوت شفتيها بإبتسامة ماكرة : لولا اني عارفة انك رايح الشركة كنت قولت دا رايح يتجوز.. ايه الشياكة دي كلها
