رساله ج الاخير
+ ـــ مودة… مش كل حاجة في الدنيا بنقدر نتحكم فيها… أحيانًا، بنبقى فاكرين إننا قادرين نغير حاجات، لكن بنكتشف إن كل حاجة في مكانها الصحيح… وأنا مكاني مش جنبك… أنا عارف انك بتحبيني بس آسف مش قادر أبادلك نفس المشاعر + اعتصرت جفنيها بألم ثم سألته بنبرة عاتبة: + ـــ ليه يا آسر… ليه بتقول كدا.. + ـــ أنا بقول الحقيقة… إنتي شخص جميل اوي… لكن أنا مش هعرف أكون الشخص اللي بتتمنيه…. ميريهان… كانت هي نصيبي… وأنا مش قادر أغير اللي جوايا.
+ دمعت عيناها لكنها رفضت الاستسلام للحزن، فقالت بنبرة متماسكة: + ـــ وإنت عارف إن قلب ميريهان جوانا كلنا، أنا وإنت، وكل حد حبها… يمكن ده اللي يجمعنا بدل ما يفرقنا. + ابتسم ابتسامة باهتة، ثم قال بحزم: + ـــ يمكن… بس مش دلوقتي…. محتاج أرجع ألاقى نفسي الأول… لو فضلت معاكي.. هنظلم بعض. + بقيت مودة صامتة للحظات، ثم أومأت بهدوء، فهمت من كلماته أنه يحتاج وقتًا، وربما مسافة، لكنها لم تستطع منع نفسها من التمني بأنه سيعود يومًا.
+ بعد أن غادرت، جلس آسر على كرسيه، شعر بثقل لا يوصف يجثم على قلبه. أخذ نفسًا عميقًا، ثم همس: + ـــ آسف يا مودة… آسف. + بعد مرور ستة أشهر…. + كانت الغرفة التي تجلس فيها صافية هادئة، النور يتسلل من نافذة صغيرة ويعكس بريقًا دافئًا على وجهها الذي كان يعبّر عن مزيج من الحزن والإصرار. عائشة كانت بجانبها، تتحدث عن تفاصيل يومها، ولكن صافية كانت غارقة في أفكارها. +
عائشة: “صافية، بجد، ما شاء الله، كل حاجة فيكي اتغيرت… بقت حركاتك وأسلوبك في الكلام مختلف تمامًا… من أول ما جيتي هنا، حسيت إنك مش هتتغيري…بس الحقيقة ما توقعتش توصلي للمستوى ده.” + صافية ابتسمت بخجل، لكن عيناها كانتا تتحدثان عن شيء أعمق. + صافية: (بصوت منخفض) “أنا بحاول أكون أفضل… مش عشان نفسي بس، عشان حمد كمان.” + عائشة: (مندهشة) “حمد؟!… هو لسة برضو مبيكلمكيش؟! ” + صافية: (بحزن واضح) “لا… هو مش عايز يكلمني. حاسه إنه بعد عني خالص… وكأني مش موجودة في حياته.”
+ سكتت للحظة، ثم أكملت وهي ترفع نظرها إلى عائشة. + صافية: “أنا عايزة أثبت له إني بقيت جديرة بيه… إني مش زي الأول…انا اتعلمت حاجات كتير… مش بس عشان يكون عندي ثقافة و شياكة… لا دا كمان عشان أكون الشخص اللي يستحقه… عشان يكون عنده سبب إنه يفتكرني… ويرجع يكلمني تاني.” + عائشة كانت تنظر إليها بإعجاب، ثم قالت بحنان: + عائشة: “أنا عارفة إنك قويّة يا صافية، وأنك مش هتوقفي لحد هنا…. التغيير اللي عملتيه في حياتك مش سهل، وإنتِ لسه في البداية. بس… لو حمد مش شايف ده… ده مش ذنبك.”
